樓市靜咗好幾個月，諗住用長成交期摸貨賺快錢嘅炒家，唔少焦頭爛額，個別唔甘心蝕本，惟有頂硬上收住租先，短炒獲利幾乎絕迹。
不過，負面消息並冇嚇怕炒家，尤其炒開細價樓嗰班，深信樓價過埋年會升，偷步喺假期入市，專執平貨。
蘭西問過屯門中原陳志輝，佢話班勇猛炒家，唔少炒埋股票，炒樓資金大多嚟自炒股利潤，佢哋習慣將資金調嚟調去，股票賺咗攞去買樓，又或者掉轉，就算睇錯市，都唔會輸入肉。
好似幾日前，有個炒家即睇即買，以六十六萬入咗件屯門澤豐花園四座高層五百二十呎單位，每呎唔使千三蚊，低市價五至八巴仙，諗住使三兩萬執靚佢，喺三個月成交期內摸出，預計賣到七十六萬，扣除使費有六、七萬執。究竟如意算盤係咪打得響，要睇個市嘞。
電郵地址：[email protected]