近年打開電視報紙，最常聽到都係反恐戰，究竟係點打可能無咩人講得清楚，不過唔少遊戲都陸續加入「反恐」內容，好似第一身射擊遊戲名作之一嘅《RainbowSix》將會推出PC版《Lockdown》，就喺石屎森林戰場之中，加入應付恐怖分子嘅挑戰，面對隨時發生嘅生化危機！
記者：許福合
(C)2005RedStormEntertainment
講起《RainbowSix》之所以咁受玩家歡迎，全靠一個真字！今次PC版比家用版推出稍遲，不過仍係PC版最能保持水準。最明顯例子，係當連線玩時，家用版搞到各隊員頭髮七彩咁款，似街邊流氓多過執行任務嘅反恐部隊，今次來到PC版就通通得到「改良」。
小隊突擊戰
今集內容豐富得多，淨係場景已添至14個，加埋等玩家發掘嘅隱藏版圖，肯定有排玩，遊戲保持一貫《RainbowSix》風格，主打城巿戰，好似一開始喺停車場開戰，由於停車場燈光較暗，好多時突然被放冷槍，所以一邊推進嘅同時，一定要搵定掩護點，通常筆者都鍾意躲喺牆角，用瞄準器睇清楚先行，加上今集仍採用小隊制，基本上會有3名隊友協助，好多時隊友都會自動自覺走上前視察環境，並且說明現場情況，所以最好開着聲來玩，就順利得多！
隊伍成員之中，獨缺狙擊手就比較奇怪，雖然玩家可透過轉視點方式來遠程射擊，不過總唔能夠長時間開住狙擊模式，武器組合方面就要調配一下。
輔助武器要識配
講到武器更係交足功課，最常用同好用嘅首選，當然係同真實英美反恐部隊所配備M36c機槍。喺開戰前，更可以替武器加上輔助工具，如紅外線瞄準器、滅聲器、彈匣等。以最常用嘅M36c為例，除咗特別任務，可能要裝置紅外線瞄準或滅聲器外，最好用都係彈匣，裝上後狂射一百發子彈，面對人海般嘅敵人都唔使驚！
另外記得拎多幾個手榴彈，不過放彈鍵最好設於遠離一般操作按鍵，否則好容易炸死自己！反恐戰亦配合有「非常規」嘅武器，其中最好用就要數到防生化裝備，及行動嘅偵測器，用咗之後無咁容易被人伏擊。
電腦AI超高
PC版同家用機比較，最主要係解像度更高，場景更逼真，據知今次圖像引擎重新設計，無論人物到角色都更真實，只要睇睇幾名隊友，各有唔同造型，設計亦非常精細，連頭盔同避彈衣喺唔同角度會有不同反光，而場景內大多數物件受到射擊都會被破壞，可以好真實重現戰場情況。
另一改良之處，係不論敵我兩方嘅AI都好高，我方隊友除識得偵查環境，當玩家指示前進位置，就會自動自覺選擇位置作好準備，破門、閃光彈都唔使玩家操心，而敵人亦會識得利用環境找掩護，並會開火阻止玩家前進，玩家操縱層面看似少咗，其實更貼近真實情況。
槍手意見
PROFILE
遊戲類型：射擊
遊戲平台：Windows
遊戲人數：1人（可多人連線）
開發商：Ubisoft
推出日期：2月10日
行貨售價：$280
查詢電話：Ubisoft（28868565）
