鄭中基在賀歲片《春田花花同學會》中，一人分飾三角，原來現實生活中他亦是麥嘜fans，最喜愛的角色就是禿頭校長。他覺得黃秋生最啱扮校長，陳慧琳則是做MissChan的最佳人選。
賀歲片《春田花花同學會》出動近四十位藝人參與演出，包括陳慧琳、梁詠琪、方力申、吳君如、詹瑞文、黃秋生，甚至韓國男星池珍熙亦有份演出，星光熠熠。鄭中基（Ronald）在片中更一人分飾三個角色，分別是在寫字樓工作的主管、管弦樂團演奏家和琴行售貨員。
難忘戴遠視鏡
在現實生活中，原來Ronald亦是麥嘜fans，在眾多人物中，他最喜歡春田花花幼稚園中的禿頭校長，他日前接受訪問時說：「我覺得校長個樣好懵，但又好得意喎，佢重可以做好多角色㗎，校長又係佢，黎根其實都係佢嚟㗎。我都有睇佢哋嘅故事，喺咁多個系列中，我就最鍾意常餐篇，我睇完黃秋生同吳君如配音嗰套戲後，就留意多咗。其實我覺得呢套卡通片係畀大人睇嘅。」Ronald覺得黃秋生最適合做故事中的校長，陳慧琳則是演老師MissChan的最佳人選。
在《春》片中，Ronald的三個角色造型均別出心裁，他自言最喜歡售貨員一角，最難忘則是扮marketing主管，他說：「呢個角色要我戴住遠視鏡，戴住咗真係睇唔到路，又企唔直個身，所以我拍之前要認住啲路點行，而且戲入面講佢每日返到公司就俾張兆輝用腳夾住個頭，夾到收工。」
採訪：王連連 攝影：陳俊強
髮型：HoraceTse（Chin.G）
化妝：YanLai
