大市繼續調整，恒指跌50點，國企指數則跌68點，成交330億元，入市資金仍源源不絕。大市急升後回一回氣，好正常，特別係中資股，唔調整一下，好難再落手。
基金股有長升、但亦間中有震倉嘅特性，但只要有耐性揸落去，九成九可以賺到大錢。噚日中資股唞氣，基金就趁機把中國海外（688）震倉，由最高4.475元插到落4.15元，收4.175元，跌5.1%；類似嘅震倉在去年10月同12月時都試過，每次震完倉，股價都再推向另一個高位。今次震完，再升破4.475元阻力，最少可見4.8元。
電機股哈爾濱動力（1133）同上海電氣（2727）逆流而上，睇勢兩隻股票重喺在收集階段，東方電機（1072）亦然，後市重有排升，繼續以上移止賺位方式持有，賺到盡。中國糧油（506）高見4.4元後回收4.325元，逆市升3.6%，若有機會見調整，可加碼，中線仍以5.3元為上升目標。
7倍PE已值0.84元
中國石油（香港）（135）前日破位而上，噚日跟市調整，收2.275元，跌3.2%，若有機會落番2.225元，係另一次低吸機會，中線仍睇2.6元。中資線話中油在新春期間會有新景象，果然紅盤就對辦，若再破位而上，話唔定真係會見到3字頭。
中民燃氣（681）連續大升兩日，噚日最高0.63元，收0.6元，再升7.1%，成交又再增，有1.18億股，推介時股價0.48元，短短兩日，上升目標已超額完成，短線可能要唞一唞氣，但長線看好，等內地彩票業個牌一發出，股價又會再飆升。
中資股急升嘅要調整，但落後嘅就會趁機接力而上。內地有一個幾高知名度嘅基金，聽講收集首長國際（697）已好耐，噚日大市雖跌，但在0.59元已買唔到幾多貨，卒之要連掃兩檔，高收0.61元，升2仙。首國在0.55元至0.6元水平，已整固個多月，可以講話未升過，短炒有得諗。
首國轉型鋼鐵業，成績有目共睹，兼且日後重會有注資同重組嘅憧憬，05年（12月年結）上半年已賺3.34億元，大升2.2倍，每股盈利7.2仙，估計全年每股盈利12仙，以PE7倍計，股價已是0.84元。
郭兆誠