香港係國際城市，好多外籍人士重係投資高手，買賣物業賺大錢，例子唔少。薄扶林置富花園十四座低層F，外籍業主農曆新年假期返香港，見有買家大年初一嚟傾價，咁有誠意，願意減價約一成一，以二百零五萬成交，單位六百九十四呎，每呎二千九百五十四。
呢個外籍業主肯筍價賣樓，原因係佢八九年用九十四萬買番嚟，就算平啲賣，都賺超過一倍。
除咗置富花園呢啲老牌屋苑，早幾年盈大開賣同區貝沙灣，唔少外籍客入市，一年後轉手，閒閒哋賺一千幾百萬。
世紀二十一薄扶林分行陳炳強話，買家其實一早睇中呢個單位，但係因為業主唔喺香港，要等佢農曆年返港至有偈傾，𠵱家終於得償所願，可以買到平貨。
由於年初一做到成交，世紀二十一代理王中岳重可以收足佣，陳炳強喺初三搞咗個燒烤團拜慶祝一番。