國美電器噚日見記者，公布引入創投基金華平做策略投資者。有人肯科水，貴為中國首富嘅主席黃光裕，同埋佢位做執行董事嘅老婆杜鵑，一齊到場，唔知係唔係新正頭，黃主席唔再剃光頭，改留咗個平頭裝，個新look令唔少人耳目一新。
至於首富夫人杜鵑，除咗個芳名夠豔外，披一襲淡黃彩點套裝，釘一對黑珍珠耳環，笑容可掬，有問必答，一上台已經搶晒鏡。
據華華所知，黃夫人係北京科技大學畢業生，93年邂逅黃光裕時，喺中國銀行做緊放款專員，之後又做過財務同行政管理，重係香港董事學會資深會員；舊年佢以私人名義，斥資5500萬買入淺水灣56號一個單位做新居，以首富夫人身份嚟講，都唔算奢華囉。
講番個記者會，可能重係新正頭，所以有大叠利是一早放咗喺黃主席個位前面，等佢喺會後派畀傳媒朋友，一眾攝記亦都擺好相機陣，諗住影番張首富派利是嘅靚相交差，點知黃光裕會後答完問題，就一支箭咁走咗，捉都捉佢唔住，成叠利是原封不動咁放喺度。
公關於是打圓場，笑笑口講：可能黃主席聽唔到大家講恭喜發財，所以怕醜冇派！擾攘咗一輪，都係搵唔到黃首富，卒之改由黃夫人主持大局，代夫派利是兼影靚相，封封100元，大大話話都派咗三四十封。
李華華