前晚羅守耀同杜琪峰嘅銀河影像去咗跑馬地嗰間有骨氣火鍋店搞春茗，古天樂、邵美琪、林雪、林家棟、張耀揚同張兆輝都有出席。
阿杜同羅守耀兩位老闆首先各自攞咗一萬蚊出嚟抽獎，跟住任達華同古仔亦各自攞出一萬畀員工抽獎，古仔就抽到二千蚊現金獎。
臨時加Dancers
抽完獎大家又搞卡拉ＯＫ比賽，比賽完重有表演娛賓，張兆輝、家棟、羅老闆、阿杜同古仔都有唱歌表演，唔講唔知，平時拍戲好嚴肅嘅阿杜，玩起嚟成個大細路咁，佢平時少開金口，但佢原來都幾唱得吓，古仔重徇眾要求唱《Mr.Cool》，重有班臨時dancers伴舞，大夥兒玩得興高采烈，最後喺凌晨十二點先離開。
