今時今日間間大學都明爭暗鬥，咩都鬥餐死，比餐死。其中一樣爭得最緊要嘅，就係收生成績，尤其係「聯招」收返嚟嘅學生，佢哋嘅公開試成績，可以證明自己間大學幾咁馨香，幾咁受歡迎。為咗爭贏，大家亦挖空心思，奇招盡出。
忽然猛收非聯招生
最近一單有趣新聞，就係本港一間最「高」學府，突然在上年收咗六百幾個「非聯招」學生，不但相較以往忽然門庭大開，比起自己兩間主要競爭對手收緊嘅百幾個，亦可說離行離列。非聯招學生其實就係冇考香港公開試嗰啲，包括海外申請者、本地國際學校學生、副學士等。
係唔係呢間最「高」學府，忽然對海外學生青眼有加？又或者良心發現，醒覺到應該畀番多啲機會嗰班副學士？
有熟悉內幕人士分析，講到尾，原來同大學互相鬥法，要爭贏聯招收生成績，整靚張成績表畀UGC（教資會，負責撥款畀大學嘅機構）有關。
試想想，每間大學，每個學系，每年收幾多學生係固定嘅。如果一個學系收多啲非聯招學生，那麼在聯招要收嘅學生數目就會相應減少，亦即是聯招收返嚟嘅學生，其成績平均數、中位數等，就能夠拉高，交畀大學又或者UGC張成績表，就可以省靚啲。
人生在世，善良嘅動機，未必會有良好嘅結果；相反，不正當嘅動機，有時卻反過來會做番啲好事。香港嘅大學，以往都白鴿眼，睇唔起嗰班副學士，估唔到今次終於風水輪流轉。