小初記得06年首個交易日，經紀黃曾推介兩隻可以揸中線嘅股票，一隻係中化香港（297），另一隻係海爾電器（1169）。中化香港近期大發神威，而海爾電器亦於昨日出現突破走勢，急升12.8％，收0.255元，成交逾1.38億元。
小初問經紀黃點睇兩股後市，佢話如果早前低位買入中化香港，現階段可以考慮收割，而海爾電器就應該未炒完，可以升多些少至食胡。
經紀黃又話，中化香港今年1月由1.40元起步炒上，受策略股東增持至2成消息刺激，昨日股價最高見2.075元，收1.95元。
呢位策略股東係中化香港嘅重要供應商，佢增持股份加強雙方合作，當然係好事。但股價累積升幅大，加上近期肥料價格下跌，不利肥料股，所以隻股有機會唞一唞。
至於海爾電器，大陸方面有消息話想炒好耐，聽講今次炒高並無特別理由，主要係因為近期中資股氣氛好，但亦有人話會有後着。
慕容小初