童星出身的唐寧（Lelia）八歲開始演戲，但她並沒有一般童星的老積，二十四歲依然童心未泯，她珍藏的寶貝中，包括講星球話的卡通企鵝Pingu公仔和超蠢青蛙外星人Keroro公仔、男fans送的溫暖牌頸巾、滿載她四頭愛犬寫真照與生活短片的iPod及黑金剛手機，唐寧說：「開工有空檔，就會睇番啲片，成個人即刻開心晒！」 採訪：朱倬誼、攝影：陳俊強
溫情企鵝兄妹
「我鍾意Pingu一家人好耐啦，Pingu係阿哥，Pinga係妹妹。其實佢哋喺卡通片入面講嘅話係磯哩咕嚕，冇字幕，唔知乜嘢話嚟㗎，你估到幾多就幾多，但係每集都帶出溫馨家庭故事，就係因為唔使用語言嚟表達，所以唔同國籍嘅人都可以睇，從畫面中感受嗰種家庭溫暖。」
傻氣外星拍檔
「《Keroro軍曹》係日本卡通片，主角叫Keroro，佢有幾個隊員，我買咗成set返屋企，呢個公仔係我自己砌嘅模型。Keroro係一班侵略地球嘅外星人，好蠢但好有義氣，少少事就肯唔破壞地球，另外呢隻Tamama係隊友，佢好崇拜Keroro。個鎖匙扣係朋友送嘅，對眼識轉㗎，好抵死！」
iPod隨身睇
「呢部iPod係朋友舊年送畀我嘅生日禮物，盒面刻咗Lelia05-Dec-2005，十二月五號係我生日，入面有好多相、好多短片，有晒我四隻狗嘅片，金毛尋回犬BoonBoon細個個樣都喺度，重有佢第一次跳落床㖭。」
黑金剛手機王
「呢部SharpSX833電話係我舊年買畀自己嘅聖誕禮物，要成六千蚊，因為我鍾意黑色，一直期待黑色行貨。我又鍾意影相喎，呢部電話就有三百二十萬像素，好鬼誇張，可以同我啲狗影相留念。」
男Fans溫暖頸巾
「我呢排都收到好多fans送畀我嘅頸巾，不過呢條好重要，因為係個男fans自己織㗎！舊年聖誕節我出席完活動，喺停車場揸車走嘅時候，個男fans走埋嚟畀咗條頸巾我，話係自己親手織嘅，個男fans一世人第一次織頸巾，所以我都覺得好意外。」
