辣辣壽司邊個食、我唔食，你要食……」相信無乜邊個唔識呢個遊戲口號，不過今趟係由壽司變火鍋，雖然《超級無敵獎門人》已經完咗一段時間，但係獎門人曾志偉同兩位長老林曉峰、錢家樂就合資搞咗間特色火鍋店，一於三兄弟齊齊搵大錢。店內主打日、川、粵三種正宗地道菜，今次搵嚟辣妹試食，感覺如何？睇佢啲反應就知啦！
記者：羅灝汶
攝影：黃子偉
Model：Cat（Savaldor）
日、川、粵主廚坐鎮
「火辣獎門人」淨係睇門面真係估唔到係食邊一種地方菜，初時以為係四川麻辣火鍋，點知一入門口就個個員工都同你講「阿些媽些」，再行入啲又見到一個刺身壽司亭，究竟係咩葫蘆賣咩藥？原來志偉開嘅火鍋店，係玩fusion嘅正宗地方菜，店內的三位主廚，各自主理日、川、粵三地嘅不同菜式，有專門人士主理菜式更加可以保持水準啦！
試大辣噴嚏打唔停
獎門人主打四川麻辣火鍋，湯底有三大種類選擇，分別係鮮魚濃湯、牛腩濃湯及豬骨濃湯，每款湯底可以任意配搭材料，而且有辣有唔辣，任君選擇。特別是麻辣湯底，可以任意分配麻辣程度而不另收費；傳統四川麻辣鍋有紅辣椒、青辣椒、辣椒粉、子彈椒、泡椒、四川大紅椒及指天椒，睇見都辣，就連攝記影相時都抵受不了「大辣」，搞到不停打噴嚏。
a時令刺身小食$280
拼盤有鮑魚、帶子、魚司魚、北海道螢光魷魚，師傅話不同季節會有不同時令刺身推出，其他時令刺身有象拔蚌、生蝦等。食刺身時記住唔好用任何醬油，以免蓋過刺身鮮味。
b海皇卷$38
表面睇似係一般春卷放咗喺玻璃杯而已，但當你一口咬落去時竟有三種海鮮味湧出來，裏面三種海鮮都係人客一order就即刻整，中式春卷皮包住鮮蝦、日本海膽同明太子，一啖咬落去就可以試齊三種味道，果然出色！
c大千雞$68
正宗四川名菜，辣味適中；雞肉方面用雞胸、雞髀肉，做到真正皮細肉滑！師傅將雞肉連骨切成細塊後，亦無出現骨肉分離情況，食時泡紅辣椒特有嘅酸、辣、香味道均勻散出，就算唔食得辣嘅朋友都可以一試。
d味噌若雞$38
師傅經過繁複工序之後秘製出味噌醬汁，均勻地塗上新鮮嘅去骨雞髀肉上，再放上燒烤架燒，最後配上紫蘇葉同葱絲，非常入味，因為味噌汁比較甜，所以醬燒後嘅雞髀肉有陣陣炭香及甜味，絕對係食過翻尋味。
e豆瓣燒焗銀雪魚$98
又一道正宗四川菜！豆瓣醬酸酸甜甜再加一點點辣，用來焗銀雪魚真係無得頂；銀雪魚用咗最嫩滑的部份，而且斤両十足，燒焗之後表皮變得十分入味，魚肉就主要以鮮甜為主，沾上點點豆瓣醬，一次過有齊兩種口感。
f即製手打新鮮肉丸$20（每款6粒）
獎門人主打麻辣火鍋，唔使講所有配料都係用最新鮮㗎啦，即製手打肉丸系列最值得介紹，包括豬、牛、蝦、墨魚及鯪魚，肉丸餡料就有鹹蛋、鵝肝、芝士、海膽，客人可以隨自己喜好選擇餡料釀入肉丸入面，加埋有成16款不同玩法！
I級小辣火鍋
II級中辣火鍋
平時食火鍋每樣醬料都要加錢，但係呢度就有一大盆醬料任點，有野山椒、辣椒粉、葱花、XO醬、生蒜、熟蒜、麻醬、炸乾葱、芫荽碎、辣椒絲、豉油，總共有11種醬料任你點。
火辣獎門人特色火鍋專門店
地址：銅鑼灣羅素街2-4號二千年廣場3樓
電話：28336516/28336526
