紫微Y睇咗左丁山年初一寫「木狗有氣」，對左丁山講：「本來各人有各人嘅預測方法，不過我覺得八卦邱嘅推論有啲報喜不報憂，心為之危，故此對你講幾句。根據紫微命盤，狗年嘅遷移宮內有陀螺，並非吉兆。遷移宮有陀螺，主有阻滯，有阻延，即係話搬遷，旅行過關不順暢，有啲事阻生晒，阻手阻腳。」旅遊不順暢？好似只有沙士時期試過啫噃。
左丁山識啲唔識啲，畀佢嚇親，但佢再講落去，與師傅C所言，有啲相似，於是向紫微Y追問：「投資環境如何？」紫微Y話：「切勿高追，升上去一定跌番落嚟，股市到咗年尾，唔升得幾多，我最近都叫朋友暫時唔好買樓住。話只能說到這裏，勸你唔好太樂觀而已，狗年係丙火年，豬年係丁火年，你都識得寫，甲木旺，可生火，你從好處講，我從壞處看，今年好容易有人煽風點火，過甚則會撲火不及或遠水難救近火。中東伊朗搞核子，哈馬斯贏咗巴勒斯坦大選，兩個火頭已經在熱火地帶點着咗啦，總要小心。」
咁講法，左丁山唯有小心，今年不可貪心，老實做人便是，好彩自己從來都唔貪心，所以冇大起大發，因此亦避免大跌，總之平穩是福。
紫微Y之後送來請帖，原來嫁女，喜做外父。佢都識揀日子，在星期六擺酒請客，咁都可以去飲番餐，如果係星期一至五，就一定禮到人不到。現在結婚酒流行放Video，新人演講，一對新人父親演講，有時甚至加埋表演（如果新郎新娘係音樂高手嘅話），於是五時恭候，八時入席，九時睇騷，九點九有得食，賓客餓到肚軟。碰啱左丁山呢類例牌到咗九點半就先行告退返屋企瞓覺之人，冇啖好食。以前為咗畀面，唯有苦捱，近月見過幾單九點九冇得食之例子，決定不再奉陪，事先向老友講明：「恭喜恭喜，恕怪恕怪不到場！」老友記都明白嘅，唔會話左丁山唔畀面。啲父母與子女其實應該一早談判好，唔好玩得太過份，以免賓客提早離場，產生尷尬。