打工仔過完年返工，梗係想收開工利是，中原集團主席施永青同高層黃偉雄及張奕威，噚日拎住一大袋開工利是，派畀後勤員工，每封五十大元，比舊年嘅二十蚊，多咗逾倍。
前線一樣有得收，甚至連中原中國員工都冇例外。以中原集團有逾萬員工計，單係開工利是都要幾十萬。
至於農曆新年四日假期，凡開單嘅中原前線，都可以有二百蚊開單利是收。
另外，美聯集團就一如傳統，開工利是二十蚊，不過，主席黃建業會私人再派利是，聽講係一百蚊一封。美聯後勤總共有四百人。至於喺初一同二開單嘅前線，促成買賣有三百八十蚊開單利是，做到租務就有一百八十，暫時統計，派出逾兩萬蚊。
電郵地址：[email protected]