郭富城獲相士贈言狗年桃花大旺，感情多年沒着落的他坦言渴望拍拖，又希望今年行正桃花運，若然遇到合適對象，不排除會閃電結婚，而眼大嘴細的靚女就最合他心水。
郭富城昨日在尖沙嘴海港城出席「金龍醒獅賀新歲」活動，現場有舞金龍和醒獅表演，吸引不少市民圍觀。大會更特別安排兩位兔女郎向城城送上九份禮物，每份禮物皆寓意吉祥富貴，之後城城向市民大派新年揮春，場面熱鬧。
歎放走竹升妹
生肖屬蛇的城城獲相士贈言今年桃花暢旺，原來他亦渴望拍拖，若遇到心儀對象，不排除會閃電結婚，城城說：「大家都好關心我呢個問題，我咁大個仔，如果遇到合適嘅人，拍拖都好正常，之前我講過有心儀對象，但始終冇勇氣行多一步。個女仔係竹升妹，可能人哋已經返咗外國，我又冇問人攞電話，𠵱家諗落都覺得笨，不過兩個人拍拖溝通好緊要，都要相處過至知，如果真係搵啱，我會閃電結婚。」
鍾情眼大嘴細
城城慨歎情人節要孤單度過，他說：「重未有着落，點安排節目啫？最好到時識番個，出年就有伴去旅行，既然相士話我桃花旺，我會主動啲，咁我當然想搵個同我合襯嘅女仔，係靚女就最好啦，最好係眼大嘴細個種，不過緣份呢樣嘢都係順其自然好。」
採訪：魯萍
攝影：仇志德
