狗年紅盤，未能高收，但恒指由跌99點變為只跌10點埋單，都算硬淨。重磅藍籌中，和黃（013）唔見1.45元，跌幅1.8%，已經拖低恒指20點，滙控（005）跌1元，又拖低恒指36點。
H股指數收6431，大升154點，升幅2.5%，跑贏其他指數。H股指數累積升幅已大，買相關指數C輪，要諗埋獲利回吐、風險因素。
和黃C輪9043：和黃因為分拆意大利3G傳有阻滯，開市後8分鐘，散到落全日最低77.60元，中段上番些少，到鳴鐘前幾分鐘，沽壓又再出現。和黃在78元上下浮沉，已有3個幾禮拜，大市氣氛良好，再向上衝，重磅股一定有份。公司壞消息，小兒科，意大利3G分拆，遲早成事。消息壞得過盈保（065）報大盈利？盈保現價更高過暴露報大數之前，由上周低位起計，更加反彈13%。
趁和黃有「壞消息」跌價，低買C輪，博反彈。
主角對象係9043，下月初夠鐘，輪價47.5仙，溢價1.1%，槓桿率16.4倍（有效13倍），引伸波幅23.9%。
中電信C輪9796：中電信（728）連續兩日每日有7億幾銀成交，係之前2.3倍，炒緊落後，買C輪短炒，向9796埋手，9月初到期，輪價37仙，溢價4.1%，槓桿率8倍（有效5.6倍），引伸波幅27.7%。
章盛