港股新春大吉，藍籌雖略有所失，但中資股揸家就大獲全勝，H股指數高收6431，大升154點，上升股（不計認股證）有410隻，炒股唔炒市，狗年有一個好開始。
兩隻內地地產嘅龍頭股，真係升到你唔信。中國海外（688）高收4.40元，大升9.3%，「些那」已唔見幾多，好明顯係基金已收亁晒，後市睇幾多？基金話晒事。華潤置地（1109）升6.4%，「些那」亦疏疏落落，做完「披成」後，大行再收多一輪，貨源更集中，升勢有餘未盡。
電機股哈爾濱動力（1133）同東方電機（1072）繼續長驅直進，哈動高收6.40元，升4%；東機曾搶上10.80元，收10.35元，升7.2%，兩股重可以上移止賺位繼續持有。
噚日收到料，話另一隻電機股上海電氣（2727）短期內會再開車，初步目標係3.60元，中線可見4字頭。上電又係基金股，睇得到嘅有UBS-AG、德意志銀行、新加坡政府投資、HSBCHALBIS、JPMorgan、LloydGeorgeInv.同Siemens等，加埋已佔咗H股47.5%，重有揸住唔夠5%嘅未計，呢啲咁重磅嘅基金股，一升起上嚟，又係會幾棍咁上。
內地消費同零售股，呢輪又係大受追捧，好似隻蒙牛乳業（2319），連續幾日都新高收，永恩（210）更加搶升到5元水平，雨潤食品（1068）同金威啤酒（124），噚日亦創出新高。基金同大行看好消費股，未點升過嘅，更加有得諗。
中國糧油（506）近日雖由低位回升，但只係去番1年前4.20元嘅水平，同03年底嘅歷史高價5.30元仍有一段距離，中糧周線圖走勢已形成大型複式雙底，一升破4.20元頸線阻力，上升目標5.30元。
重組大計快落實
中糧主要產銷食用油、豆粕、糖果、麵粉，而屬下的長城葡萄酒，係內地3大酒莊之一，亦會成為未來業務發展的主力。有消息指出，中糧的重組大計快將落實，最快未來一兩個月可公布。
其他消費股已大升，落後的中糧更有留意價值，只要大行完成收集，中糧股價就會突飛猛進，中線持有，可獲厚利。
郭兆誠