狗年首個交易日，港股高開但旋即回軟，臨收市前跌幅收窄，小初諗住會以紅盤收市，但最終仍跌10點。不過，紅籌國企就照升如儀，完全無視加息同埋油價因素，H指累積升幅之大，實在令小初有多少擔心，唔知重可以玩幾耐。
昨日升得最勁、最觸目的股份就係老虎仔嘅遠東發展（035），隻股早排長期在2.70元水平橫行，但過年前開始見異動，昨日急升15.79％，收3.30元，成交大增至2.32億元。
經紀黃話，遠展無論喺早排地產股熱潮或近期澳門股升浪中，走勢一直大落後，基本上無乜升過。有傳言對沖基金睇中遠展，但就似係流料居多。
另外，去年上市即破底的海升果汁（359），近排走勢明顯轉勇，據講係因為終於獲得芬佬睇起，隻股昨日升6％，收0.87元，雖然只係比招股價0.83元略高，但原來已經係上市新高。
慕容小初