年年香港電台新春團拜，例必搵各大電子傳媒阿頭嚟順便傾吓偈，無他，因為大家都要畀面出席嘛！今年新加入嘅包括小小超旗下猛將之一、8號仔首席副總裁（新聞及財經資訊）史提芬．羅燦。今年嘅話題當然離唔開3月正式開檔、小小超靠佢嚮朵做真正傳媒大亨嘅財經台。燦哥話，初步目標係要請110人，𠵱家經已請咗104個，當中60幾個係技術人員，但編採人手就好難請，尤其係好難叫得郁啲報界精英轉做電子傳媒，所以，𠵱家用住啲新人先，開台後會慢慢搵埋嗰6個空缺……總之，終極目標係做中文CNBC！
有興趣轉工嗰啲行家，不妨搵燦哥傾傾，但畀個貼士大家，自認係靚仔靚女又或者係精英嘅先好搵佢，因為噚日有幾個行家即場「見工」，點知燦哥無動於衷，真係Hurt。據知喺800個人選中，只係請咗20個新人，平均40人先請一個，話質素好勁，保證大家下個月一見驚豔喎！