話說市場上永遠都有恐龍公司，佢哋唔單止大，重要阻住市場發展。不過自由市場入面，永遠都有新公司去挑戰恐龍，呢啲係市場嘅自然現象，叫做創業。
創業者永遠都係要面對財雄勢大嘅對手，情況就好似故事裏面嘅大衛對哥利亞。當然，用一鋪蠻力去鬥冇話唔得，但係俾人打到遍體鱗傷又怪得邊個？當年大衛打低對手，靠嘅係睇準哥利亞嘅眉心命門射一粒彈珠。創業者面對大財團，一樣要快而準，唔可以用死力。
今日利世民要講嘅故事，係美國紐約一間叫做Glaceau飲品公司嘅發迹史。話說1996年嘅初春某一日，有個34歲嘅後生Bikoff，喺屋企廚房攞咗支樽裝水嚟飲，剛好佢又想補充維他命C，就順手攞一片汽水餅含喺口，忽然間佢就諗︰「點解樽裝水唔可以有維他命C？」一個諗頭就開始咗呢位仁兄嘅創業路。
8年變出3億營業額
市場上咁多產品，其實非酒精類飲品都算係最難開拓市場嘅一種。一來市場戰線長，3歲到80歲都可以係顧客，目標太多反而好難重點推銷；二來飲品嘅分銷成本極高，如果喺超級市場賣重要畀上架費，真係未見官先打八十大板；三來對手財雄勢大，汽水界有紅藍陣營分庭抗禮，單係廣告開支已經係天文數字。
Bikoff睇準健康市場，知道有一班人嫌汽水冇益樽裝水冇味。開始嘅時候佢挨家挨戶去求小舖頭幫佢賣佢發明嘅「健康水」。佢明知「健康水」同汽水冇得揮，所以特登要求舖頭老闆將佢嘅「健康水」放喺其他樽裝水旁邊。結果呢個策略非常成功，Glaceau喺8年內已經成為一間營業額3億美金嘅公司。邊個話大衛打唔低哥利亞？
同Bikoff合作過嘅人，都話佢嘅優點係魄力充足，而且夠膽試新鮮方法。最重要係佢對人好有誠意，同佢合作嘅人最終都做埋朋友。原來做生意同做人道理都係一樣，要有好奇心有熱誠，打低哥利亞唔係難事。
利世民