噚日年初四正值吉日，金市股市狗年紅盤高開，財經事務及庫務局局長馬時亨按慣例，到金銀業貿易場主持開市儀式，之後大派同佢一樣肥嘟嘟嘅金元寶朱古力，同埋印咗大大個「馬」字嘅利是。同往年一樣，亦同曾特首唐司長等三司看齊，每封50元，真係識做。依華華估計，馬局長手上原本應該有成200封利是，最後只派剩十零封，即派咗成皮嘢出街，都算大手筆。
肥局長話，啱啱同太太及大女去完東京玩。而狗年係佢嘅推介年，噚日已簽咗offshorefund條bill，可恢復二讀，年內重有好多條草案上，希望順順利利。
至於股市新春開市儀式，因為主席李業廣外遊未返，由行政總裁周文耀頂上。周總裁恭祝大家身體健康，經紀買賣就出入平安，都幾啱聽，不過最重要都係交易所系統平平安安，千祈咪學東京咁要停市。至於周總裁所派利是都係冇變，就位位20蚊。以佢持有港交所認股權，喺過去1年隨股價水漲船高（周總裁03年5月1日加入港交所，翌日港交所授出246萬股購股權畀一位執行董事，即係佢啦；行使價8.28元，港交所昨日37.7元，呢批購股權若未行使，值7232萬，重肥仔過肥局長），好似唔多成比例。
李華華
