傅穎（Theresa）日前細數五件最有紀念價值物品背後的故事，當中最感觸良多的是前男友送的銀戒指。Theresa與前男友拍拖三年，但入行後便與對方分手。另外四件寶貝包括Cookies九餅女最後一張合照、中學校刊、第一次與逾百歌迷慶祝生日的大合照及姊姊送的錄音機。
九餅女合照
「呢張相係Cookies九個成員拆夥前，最後一次上《勁歌金曲》影嘅合照。睇住張相就諗起當晚嘅情景，唱《最後一塊》嗰陣九個女仔喊到泣不成聲，都唔知邊個喊先，總之就個個都喊到豬頭咁，𠵱家睇番真係好感觸，重覺得自己真係成長咗。」
傷透心銀戒
「隻戒指係前男友送嘅，一段感情係嗌交分手，我都冇咁傷心，但係我同佢係因為愛情變成感情，佢同我一齊之前，佢係鍾意另一個女仔，有一日我問佢係唔係鍾意番嗰個女仔，佢居然唔出聲，嗰一刻我已經知發生乜嘢事，我傷心欲絕，於是主動提出分手。」
百歌迷聚會
「○四年生日同過百歌迷慶祝時影嘅，包括來自馬來西亞、內地、香港、美加同新加坡等地嘅fans。我知道有啲fans係由Cookies九個人時開始支持我，之後陸陸續續有新fans加入，為咗答謝佢哋嘅支持，我買咗啲糖送畀佢哋，重畫咗十幅畫抽獎㖭！」
校刊騷哥利
「本中學校刊登咗我中二時參加美術比賽嘅展品，係用鐵絲同報紙整嘅，命名為Singer。我整呢個像時只係用啲報紙同鐵絲堆吓砌吓，整整吓就覺得呢嚿嘢好似一個歌手揸住支咪唱歌，所以就改咗Singer呢個名啦。」
親情錄音機
「我好鍾意聽歌，於是姐姐就買咗部卡式帶錄音機送畀我，但呢個年代唔係用MD，就係用MP3㗎啦，佢重送埋好多錄音帶畀我，好搞笑。𠵱家我會錄起心血來潮哼嘅音樂，希望有一日可以畀人修改吓自己嘅作品，之後收錄喺自己嘅大碟度。」
採訪：李珮洳 攝影：仇志德
場地及服裝提供：izzue
髮型：VincePangofILCOLPO
