華華過年前睇到報道話電盈前副主席張永霖加入香港興業，做非執行董事。除此之外，佢重係中國聯通、泰康人壽及安達國際嘅獨立非執董，都幾多嘢搞。
張永霖同華華講，話家吓比退休前更忙，淨係喺港大，都已經有八個職銜，一個星期見足徐立之四晚，唔係開會就係晚飯。此外，科大又搵佢去同班學生演講，張永霖開咗個條件㖭，係乜？梗唔係錢啦！
佢話喺演講前，要班準聽眾先聽吓佢喺港台嘅節目先，到時講起來，大家可以互動啲，多啲共同話題。張永霖話係第一次同人開條件，本來以為科大唔會應承，但對方聽完不知幾開心。
演講會對張永霖嚟講，真係濕濕碎，但一講到佢個電台節目，就唔係咁講！佢話自從港台無咗賽馬節目後，佢個節目每個星期都要做一輯，次次題材都唔同，又要有趣味，所以要成日睇書、思考、觀察咁，以前打工都無家吓咁勤力；佢曾經同港台講過，做到今年3月就唔再做，但係對方竟然好似有心避佢咁，搞到佢唔知點。計華華話，呢類節目，洋名阿Ray嘅黃生照計唔似會反對嘅，唔使怕喎。
李華華