本港經濟雖然持續改善，但打工仔嘅工作壓力有增無減，加班超時幾乎已成慣例，𠵱家好多時連假日都要開工。
就以呢個農曆年四日假期為例，四大代理行就有近一百六十間分行，年初一都開門營業，而一啲相關嘅行業，都有咁嘅情況，其中一個就係按揭代理行業；經絡按揭轉介公司今年首次派出十幾個按揭大使，穿梭美聯同港置嘅主要分行，向客戶提供樓按優惠同資訊。
呢批按揭大使去過嘅分行包括鰂魚涌太古城、西灣河嘉亨灣、荔枝角美孚新邨同天水圍嘉湖山莊等，另外又落到大角嘴港灣豪庭新盤售樓處。
按揭代理公司早排鬥優惠，只要有一間宣布有優惠提供，同行就即時照抄可也，今次經絡假期唔休息嘅做法，睇嚟會搞到同行遲啲都一樣假期冇得抖。
電郵地址：[email protected]