科技大學登報招聘DirectorofPublicAffairs（公共事務總監，俗稱大公關），條件似乎唔曳，有能者可以考慮。近五年來，各大學重視公眾、公共關係，將以前原本只係應付報界查詢及發新聞稿嘅辦公室，升格為公共事務/大學傳訊總監，負責大學對內對外嘅傳訊工作，你知啦，𠵱家大學為咗應付政府削資，調整資源運用，制訂新政策，經常被教師、學生、校友挑戰，鬧交之餘，重要花費大量精神時間於內耗之上。為咗籌款，要大力宣傳學校威猛，籌唔到都幾冇癮，點知籌得多，都會有得把口之人出位反對；又要爭尖子呢，梗係要諗啲方法搶人啦，公關點可以唔參加埋一份。家吓興廣泛諮詢噃，學生、教授郁吓就會投訴諮詢不足，大學校長講到口水乾，一定要傳訊總監幫手搞對內溝通。
所以大學大公關K見到陶傑（一月二十六日）篇大學設公關損耗資源，當堂暈咗，幾乎想立刻辭職；見到校長，都未開聲，校長已笑笑口同佢講：「你冇做嘢嘅話，就識點做啦。陶傑篇文睇咗未？」公關K都唔知點答，唯有苦笑。向左丁山訴苦：「陶傑大才子或有見地，但未免一竹篙打盡所有大學公關！」左丁山勸佢不用介懷，呢位大學校長都係叻人一等之知識分子，點會唔明白今時今日大學公共事務總監之難為處吖。
大學嘅公共事務總監職位似乎好難請人，新人亦唔會做得耐，例如中大、港大、科大、城大，教育學院、浸會學院嘅人選，都係在位不太久，嶺大近兩年來已經換完又換，好似最近又懸空。最老定都係理大嗰位潘占達老兄，與電台名人吳明林同班（一九七○年中大新亞新聞系），喺理工大學做咗「不知年」咁耐，由工專做到理工學院做到理工大學，直情係理工校園內嘅人形地標，呢類人求諸今日，罕見之至。