一帆風順，萬事勝意，買邊隻中邊隻，大家咁話。
每年第1日股市，無論升定跌，都叫做紅盤。但近年愈來愈多人，叫升市做紅盤，叫跌市做黑盤。港股由73年開始普及，過去33年，新年首日紅盤升市佔21次，紅盤跌市佔12次。今年狗年第1日，照往年攤路，上升機會6成4。
中銀C輪9068：國內銀行股過去數月急升，本港銀行股則比較落後，今年會有運行，買中銀C輪，有望豐收。中銀（2388）雞年高位16.90元，現價15.55元，有追落後條件，炒中銀C輪，發發新年財。
雞年最後1周，5日計埋，中銀升10仙。C輪9068跌8仙，9021則升8仙；兩隻輪夠鐘日差不多，經過如此變化，炒中銀C輪，梗係向9068埋手。9068喺6月尾到期，輪價89仙，溢價1.4%，槓桿率17.5倍（有效11.2倍），引伸波幅16.2%。9021溢價2.6%，比9068高1.2個百分點，槓桿率相若。9068溢價如果同9021睇齊，值1.07元。
中信C輪3525：中信（267）有機追落後，吼低位買中信C輪3525。隻輪8月初夠鐘，輪價14.5仙，溢價1.4%，槓桿率15.9倍（有效10倍），引伸波幅16.7%，數據好正。
章盛