真係不認不認還須認！美國任天堂啱啱先喺一月頭正式否定新版NDS嘅傳聞，估唔到相隔唔夠1個月，一踏入狗年就反口，正式宣布推出改良版NDS，唔怪得近期NDS缺貨嚴重啦，原來Plan定清貨出新機！
記者：徐影龍
新機全名為NintendoDSLite，意思係集合輕巧同光亮於一身，機身體積由舊版148.7×84.7mm，縮細至133×73.9mm，厚度更由28.9mm激瘦至21.5mm，即係等於SONY部DCT1咁薄！摺機嚟㗎喎！重量亦由275g減磅至218g，整體畀人一種強烈輕巧感（主因係舊機太大嚿），大可踼走「磚頭」綽號！
靚芒4級校
另一大改良係屏幕新增4階段明暗調校，要光要慳電悉隨尊便。按鍵位置基本不變，只係Start同Select放咗喺機身下方。雖然新版NDS傳聞屬實，可惜僅限體積同屏幕嘅改良，爆料網站所講嘅VoIP（VoiceOverIP）無咗影，即係透過Wi-Fi嚟講電話！以NDS有咪有喇叭嘅特色，真係好適合周街傾電話喎，希望下一個改良版能夠加入啦。
網址： http://www.nintendo.co.jp/n10/news/060126.html