噚日初三狗年賀歲馬，沙田馬場丁財兩旺，未開跑前照例有醒獅助興，由政務司司長肥龍許仕仁主持點睛儀式，氣氛認真熱鬧。唔知係咪因為《蘋果》同馬會合辦「《蘋果》馬經送金賀歲」遊戲，所以噚朝沙田馬場未開門經已見有人排隊等入場，講番呢個送金遊戲嘅玩法，就係每場賽事跑完之後，《蘋果》馬經就邀請該場頭馬嘅馬主主持抽獎儀式，中大獎嗰位幸運兒可獲得一両重足金蘋果一個，另外二獎十名，各得價值八百元足金賀歲狗一隻，參加嘅《蘋果》讀者非常踴躍，現場氣氛不知幾咁高漲。
由於噚日跑十場，換言之即係有十次中獎機會，每次當司儀公布得獎者名單時，在場嘅《蘋果》讀者同馬迷都起晒哄，睇吓自己嘅號碼有冇被抽中。
爆料熱線：29290000、27860099
報料傳真：26239278
報料電郵：[email protected]