農曆年假期今日完結，商場大業主開始埋單計數，又到業績鬥一番時間，新地嘅元朗廣場商戶四日營業額三百八十萬，比舊年同期多兩成八，人均消費六百至九百蚊；最好生意嗰日係年廿九。其中潮流服飾店營業額比平日勁升兩倍；售賣應節糖果及賀年禮盒嘅店舖同超市，就多三成半。
新地嘅尖沙嘴新太陽廣場期內營業額逾三百萬，升逾兩成，內地客佔八十萬，而人均消費約一千至二千五百蚊。
同系嘅大埔超級城商戶營業額逾二千萬；但講到條數最勁都係觀塘apm商場，由一月二十三號至三十一號，生意額逾八千六百八十萬，其中年初一至初三就佔二千零八十萬；數字比聖誕檔期多八巴仙，較平日就多兩成半。
至於新地嘅銅鑼灣世貿中心商場，化妝品店升三成。上水廣場以時裝店最出色，升兩成至六成。將軍澳東港城商戶營業額一般增加半成至一成。
另外，信和嘅大角嘴奧海城商場，因延長營業時間，人流多咗，商戶生意額都有增長，部份酒樓生意較舊年同期高咗兩成。至於旗下屯門市廣場，預期一月營業額會接近三億八千萬，比舊年增加一成半。