三日新年假期後，今日開始返工，八方祝願所有打工仔今年做嘢得心應手，升職加薪。人人放假去拜年，煲呔就四圍同人講話自己冇假放，新年繼續開工強政勵治喎。煲呔咁勤力認真，都係因為北京重未表態係咪挺佢，好似港區人大團長袁武年初二同八方講，煲呔做、陳太做定邊個做特首都好，一定係要能者居之，所以煲呔時刻都要醒醒定定，千祈唔好行差踏錯。
陳鑑林外父讚手腕好
如果北京真係能者居之，陳太唔選、民主派又唔夠票嘅話，睇怕佢連任都係將會發生嘅事實，因為左派陣營都好難搵到人叻得過煲呔。好似陳鑑林嘅外父曾伯咁，佢都大讚煲呔處事手腕好，到𠵱家都重記得煲呔廿幾年前做沙田理民官（即係𠵱家嘅民政事務專員）時，點樣𠱁掂啲鄉民同政府合作。
曾伯話，煲呔上任之前嘅理民官係孫公，佢就奸過煲呔喇，為咗同啲鄉民收地起路，佢會利誘啲鄉民，講到起咗條路之後，條村從此就會好旺啦，啲居民就有着數啦！
相反煲呔就好少用呢套，佢會同啲鄉民動之以情，因為沙田唔少鄉村都係姓曾，十二笏村同曾大屋都係姓曾，煲呔就會話大家同姓三分親，大家合作合作、照住細佬啦！啲鄉民都好傳統，難得大家都姓曾，咁講啲鄉民就好受落，當正煲呔係細姪咁，點都要畀返啲面佢。
叫村民繼續支持田少
唔少行家年年都會同陳鑑林及曾伯拜年，曾伯係沙田十二笏村嘅村長，喺沙田同鄉議局都有咁上下江湖地位，田少重特登寫信畀佢，多謝佢前年喺立法會選舉投自由黨一票，連劉江華都唔敢嬲佢轉投敵營。曾伯話出年立法會選舉，佢會投返民建聯，但會叫大埔啲鄉民幫手繼續支持田少喎，哈，難得自由黨有啲咁忠實嘅擁躉。
爆料熱線：29290000、27860099
報料傳真：26239278
報料電郵：[email protected]