古巨基和森美因經常合作而成為好友，每逢農曆新年都會到對方家中拜年。早前基仔和森美一起拍戲，令友情更深厚，而狗年來臨，基仔表示要歌影雙線發展，森美則繼續多拍喜劇練演技。
古巨基和商台DJ森美向來是好朋友，早前他們一起拍內地電影《野蠻秘笈》，日見夜見，感情更深厚。戲中他倆做一對好朋友，不過森美會整蠱基仔，亦會呃老友錢，但現實生活中，他們十分老友，有最新的玩具，大家會一起研究，閒來大家一起吃飯談天，而他們在農曆新年期間，會互相到對方的家拜年。
擺甫士有默契
訪問當天基仔和森美的笑聲不絕於耳，而且他們很有默契，擺甫士時不用出聲，已經會互相協調。
基仔說：「我哋喺戲入面做好兄弟，但係我哋其實戲裏戲外都係死黨。同森美一齊拍戲，會好輕鬆，片場入面嘅氣氛好好。」森美就搞笑地說：「平時咪大家一齊鑽研吓演技囉，但喺戲入面我成日整蠱基仔㗎，而且趁佢失憶，就呃晒佢啲錢。」
計劃主攻電影
至於來年的計劃，基仔和森美都不約而同向影壇發展，基仔說：「Paco（經理人黃柏高）話今年我除咗喺音樂成績要好，重計劃畀我拍多啲戲，希望喺電影方面有進步啦。」至於森美則不急於做主角，他說：「其實我做過幾次配角，但都唔錯，因為我覺得要打好基礎先，做戲要有深度，練多幾年先。而且我估我都係做喜劇先，因為做喜劇都唔錯，自己都會開心啲。不過要練，因為我唔係天才。」
採訪：王連連、藍文浩 攝影：何國豪
道具提供：陸智夫國術總會
服裝提供：上海灘
髮型：SamuelCheung（HAIR）
化妝：NavlLam
