踏入狗年首個交易日，小初祝大家新春大吉，炒股得心應手，今年勝舊年。
講起今年勝舊年，經紀黃就推介製衣股聯泰（311），隻股過年前連升3日，原因就係高層夠勤力，頻頻同證券界會面，表示今年生意好過舊年。
經紀黃話，紡織製衣股喺05年表現差強人意，皆因被美國同歐洲嘅配額問題搞到一頭煙。聯泰05年上半年業績倒退，令股價由4元邊跌至2元樓下，市值蒸發一半。小初重記得聯泰喺去年1月，按每股4.07元配股集資，跟住股價就從未好過，當時接咗貨重未沽嘅芬佬，真係喊得一句句。
不過，家陣配額問題已經好清晰，中國與歐美兩地都講掂數，對成衣股有利。此外，聯泰在中國以外的其他地區亦設有生產線，有咩突發問題都可以作即時應變。而聯泰上市以來都一直有收購行動，據聞公司計劃收購一項針對歐洲市場的貿易及採購生意。
聯泰上周五升5%，收2.625元。
慕容小初