鄭融一向予人鬼妹仔感覺，其實她非常傳統和念舊，鄭融心目中最珍貴的是照顧了她二十多年的菲傭Aunt和愛犬Princess。而鄭融在○三年奪得的叱咤生力軍女歌手金獎，除成為她最大的原動力外，更警惕她加倍努力才能成功。
叱咤金獎
呢個○三年叱咤樂壇生力軍女歌手金獎係我第一個新人金獎，老師杜麗莎成日同我講，做每個工作時都要記得呢個可能係你最後一個工作，唔好以為今日得到嘅嘢，可以擁有一世。呢個獎提醒我，你攞一次獎，唔代表你年年都會有獎攞，能夠提醒自己要更加努力，唔係每件事都如意順利，要不斷反省。
人狗同親
我隻狗Princess同屋企嘅工人Aunt嘅地位係一樣，但千祈唔好誤會話我工人係狗，只係佢哋喺我心目中嘅地位係同等重要。我覺得佢哋成日都會喺我身邊，隻狗永遠都隨傳隨到，開唔開心都會陪我，而工人就照顧我嘅起居飲食，我當佢係朋友咁，有時都會同佢傾心事，同佢重玩得好癲，關係好好。
家傳頸鏈
呢條係我媽咪送畀我嘅第一條十字架頸鏈，我一早就做咗基督徒，媽咪以前唔係，不過𠵱家屋企人都信咗教。有次媽咪上船玩，一見到呢條鏈就好鍾意，感覺保到我平安，所以佢就買咗畀我，所以好有紀念價值。
大懵救星
我每日都要知道自己嘅行程先安心，如果唔知，我會好慌，我又冇記性，上一秒你同我講嘢，可能我下一秒就唔記得，所以乜嘢我都寫喺本簿度，就連邊日放過朋友飛機我都會寫落去，所以呢本簿對我好重要，就算我唔係做嘢，去街我都會帶住佢。
幸運之歌
呢隻碟入面有首歌叫《終生學習》，就係呢首歌令我得到其他人嘅認同，係我嘅幸運之歌。我記得錄呢隻碟時乜都唔識，完全冇壓力，我想抱住呢個心態，因為入咗行後，有時會失去方向，或者變咗另一個人，每當我見到呢隻碟，就會提醒自己，要做番未入行前嘅鄭融。
採訪：胡比 攝影：何國豪 場地提供：翠亨邨
