周星馳和特首有個午餐約會，禮賓府忽然很無厘頭，兩個不同年代的推銷員（一個推銷西藥和政改五號報告，另一個推銷特技「功夫」）聚頭，大講錦鯉，不談政改時間表，實行年尾流流，年年有餘，討個好意頭。
曾周午間短聚，沒理由只是風花雪魚，肯定會乘機互相交流，觀摩切磋一下演技。大家都是演員嘛，曾特首當公僕的年資，比周星馳從訓練班開始入行計，要長得多了。不過演技這回事，未必一定老薑辣過子薑，周星馳憑《功夫》獲得金球獎提名，跟李安一齊行過紅地氈，好歹叫做衝出了亞洲，擺脫了下下要逞英雄做亞洲國際都會的心魔，這一點，曾特首這位政壇叔父，臉皮仍嫌太薄，應當向後輩星爺學習。
大話西遊講完戲，禮賓府的竊聽器已經拆得七七八八，曾特首當下放心，向星爺摸底，呀，史提fun，有冇興趣幫下我手。星爺一聽，馬上自謙做星仔，特首辦裏人才濟濟，幾時輪到我這個政治盲毛插嘴。說話唔係咁講，前任的班底，唔多fit我，強政勵治的意思，就是要不拘一格，用人唯才。星爺跟錦鯉眼望眼，自問沒有問政野心喎。唔緊要，有諗頭，出下怪招最好。星馳一驚，莫非要我頂走任七招，在ifc總部昅實盤數？咳咳，係想請你幫教育界做點事。我睇晒你個file，入行咁耐，冇拍過四仔鹹片，兒童節目做得唔錯，應該在學界重有唔少影響力。這個……就咁決定啦，你估「焦fun」真係fun咩，星馳真係星喎，鎮得兩下吧。這個嘛……在兵頭花園一角裝了英國領事館妙製的石頭偷錄器的超級無敵狗仔隊即刻收工，拿背景滿是魚池水聲的數碼錄音回廠分析。毋庸置疑，對話是在水裏進行的。