新年好多舖頭都會休息，無諗定最佳娛樂自然係留喺屋企打機，或者喺屋企搞個機迷Party都係個唔錯提議，一班朋友圍埋一齊打機夠晒熱鬧；中國人避忌初三赤口易嗌交，與其爆粗爭執不如合力爆機！
記者：許福合 攝影：楊錦文、譚盈傑
ImageBoy：Henry、Davy
家用機圍埋Play
過年喺屋企開P，除咗大食會同唱K外，開部PS2打吓Game都夠過癮，兩個手掣輪住玩，旁邊啲人睇住電視機各自打氣，熱鬧氣氛肯定飆升！
球開得勝《WE9》
PS2呢款《WE9》可以話係最出名嘅足球遊戲，試問有邊位機迷係未玩過？當一班人聚埋一齊鬥番場，比個高低，即使喺旁邊睇亦一樣過癮，唔係球迷或多或少都識番幾個球星，一班人玩起上來就特別熱鬧。一班人玩就有氣氛得多，足球Game勝在易上手，又有對戰模式，可一較雙方球技，隨時來一場PS2車仔對紅魔鬼。（PS2）
貨如輪轉《TouristTrophy》
基本上係《GT4》嘅2個轆版本，換上各種名電單車，數量多達80款，同《GT4》一樣，賽道其實分別唔大，當然仍保留咗最多人留意嘅香港賽道，開P時可主力玩雙人鬥車模式，當揀完車後，重多個揀騎士戰衣嘅選擇，由帽、手套同鞋都可以選擇，任由玩家配搭。今集基本保留咗《GT》系列風味，不過玩落有啲難度，尤其要着重電單車平衡，否則好易炒車。（PS2）
生龍活虎《EyeToy:Play2》
《EyeToy:Play2》係一款使用EyeToy為配件嘅遊戲，同好多EyeToy遊戲一樣，都係好啱一班人一齊玩，唔使用Joystick，只靠喺鏡頭前手舞足蹈就可以玩個痛快，今集更吸引唔少女士們玩，可以一邊打機，一邊做運動，嚟緊新年食多啲年糕都唔使驚！遊戲分開各大主題，每個玩法都各有不同，如在「GOALATTACK」之中，玩家扮演一個守門員，要阻擋敵人攻勢，遊戲數量總數超過70種，玩整日都唔覺悶！
（PS2）
《MarioParty7》八喜臨門
《MarioParty》一向都係開Party首選，最新一集出咗無耐，繼續收集多個特色同過癮遊戲，起碼有90多個，而且重可以支援最多8人參與遊戲，開Party更係一流！遊戲一共收錄6個模式，其中「PartyTourMode」，就能供最多8名玩家參與，每一格都代表不同小遊戲，當遊戲回數結束，得到最多星星就係勝利者。（GC）
手提機唔使Stay
手提機好處梗係周街打得，唔使Stay喺屋企玩！朋友未到喺街度乾等，都可連線玩住先。
開P必玩《MarioKartDS》
《MarioKart》係任天堂招牌作，唔少人大時大節都會拎番出來玩番轉，今年玩法更係唔同，當輪緊大電視隻《MarioKart》時，台下又可以齊齊拎部NDS出來打餐飽，GC版可以4人玩，NDS版利用咗Wi-Fi支援，最多重可以8人同場作賽，互相整蠱爭第一，係開P必玩之作。（NDS）
百邪不侵《生化危機DS》
《生化危機》喺好多主機都出過，今次就走到NDS上，利用NDS獨有雙屏輕觸式設計，玩家除咗繼續喺生化危機中冒險外，更可將NDS支筆當作刀仔咁用，向敵人狂「劈」，而上芒就用來當作顯示地圖，真係超方便，可以睇住來行，唔怕行差踏錯！重可利用無線網絡，同朋友鬥殺喪屍或合作挑戰。（NDS）
連線歡樂《WE9》
PSP出咗咁耐，要數必買遊戲似乎都唔算多，呢隻《WinningEleven9UbiquitousEvolution》可算係PSP機主必買遊戲之一，雖然出咗一段時間，仍然見好多人通街玩，開Party更隨時可以找到對戰對手，利用無線網絡功能，可以隨時一對一鬥番場，甚至比單人模式更好玩。（PSP）
人多勢眾《街霸ZERO3》
《街霸》一向都係格鬥遊戲嘅代表，今次就推出PSP版，內容將與街機版完相同，格鬥系統亦保留原作精髓，此外，遊戲更會加入新角Ingrid，總人物數量達到37個，係歷代之最，玩家更可以利用PSP網絡功能，與朋友展開格鬥大戰。（PSP）
𢭃利是掃Game玩
新年𢭃咗咁多利是錢，梗係要預先計劃吓點使，作為忠實機迷，梗係將目標放喺電玩身上，以下幾款就可供各位掃貨。以下介紹遊戲同主機配件，只要拎住今日本版到下列地址，即可以優惠價選購。
售賣點：DreamStore（25753285）
地址：灣仔東方188商場G04及256號舖
（新年照常營業）
大紅NDS返貨趕狗年
原價：$1,380優惠價：$1,248
新年梗要紅噹噹先夠好意頭，呢部咁搶鏡嘅紅色NDS，而且重係《MarioKart》套裝版本，顏色變得更搶眼，再加隻近排幾Hit嘅《MarioKart》，相信都好夠叫座力！不過筆者最睇重嘅都係條NDS機繩，設計精美，重有個靚靚Mario公仔，無機嘅睇到都有啲心動！
DQ史萊姆手掣
原價：$398
優惠價：$268
呢個DQ手掣外形就夠特別趣怪，照足史萊姆而設計，據知現時貨量都唔多，藍色版已經無貨，而銀色重有小量供應。
NDSWi-Fi手指
原價：$358
優惠價：$298
NDS支援上網對戰，不過若然家中未設有無線網絡，只要使用呢支Wi-FiUSB手指，就可以將NDS與電腦連線，家中都可以隨時上網打機。
PSPGigaPack送曼聯袋
原價：$2,360
優惠價：$2,180
買得PSP梗係想買多個靚仔機套好好保護佢，𠵱家買PSPGigaPack就會送埋個曼聯PSP袋，另外曼聯袋亦可以單買，只要$118。
遊戲冧價值得翻煲
NDS《任天狗》
原價：$288
優惠價：$228
《任天狗》相信都唔使多介紹，呢隻養狗為主遊戲可以話令NDS大熱，亦吸引唔少女Fans玩埋一份，隨時同其他狗主交換道具，打機都可以識朋友。
NDS《狐忍》
原價：$288
優惠價：$218
玩法係RPG，喺貼近原著同時，亦加入新意；戰鬥時可利用觸屏直接調動角色，排陣非常方便，亦可透過NDS無線機能，同其他玩家對戰或交換道具。
NDS《ViewtifulJoe》
原價：$288
優惠價：$198
《ViewtifulJoe》特別強調超靚姿勢動作，動作特別誇張，好似當玩家使用一拳揮向敵人時，戰場畫面會非常激烈華麗，白影效果非常正，而且伴隨音效亦相當正，喺手提機算係不俗。
其他筍貨
《櫻大戰Ⅴ》序章PS2
（原價：$188 優惠價：$18）
《獸王記》PS2
（原價：$180 優惠價：$38）
《魚仔》PS2
（原價：$188 優惠價：$38）
《SD高達大決戰》PS2
（原價：$280 優惠價：$38）
《高達一年戰爭》PS2
（原價：$368 優惠價：$98）
《SD高達SEEDG-Gen》PS2
（原價：$388 優惠價：$198）
《EyeToy捉馬騮》PS2
（原價：$180 優惠價：$38）
《SOULCALIBUR3》PS2
（原價：$398 優惠價：$238）
《看我龍顯神威》PS2
（原價：$180 優惠價：$38）
《龍之戰士Ⅱ》PSP
（原價：$268 優惠價：$88）
玩家開Ｐ心水之選
