㷫新春:辣到赤口無交嗌

㷫新春:辣到赤口無交嗌

年初三,赤口,易生口角,一般阿媽指引不外乎勸喻大家少安毌躁,少說話就少交嗌。計我話,想唔嗌交就最好塞住把口,食餐勁,重要唔辣唔食,食到把口赤赤痛為止。𠵱家幫你搵埋初三照常營業的勁辣食肆,食完自己乜火都散晒,隔籬位朋友又只會掛住飲水、流鼻水同抹眼淚,重鬼得閒同你噴口水咩?口水都無得噴,交就嗌唔成喇。

記者:陳慧茵 
攝影:何家亮
模特兒:Cat、Crystal(Salvador)

亡命大辣食到噴火

「北角小辣椒」以正宗四川菜遠近馳名,新春期間照常營業,夜鬼必去。老闆劉師傅本身係四川人,堅持烹調最地道川菜,畀貼士,講明先,地道唔只係辣,重係勁辣,好彩客人可自行選擇辣度,最高級數為5隻辣椒,要食幾辣唔該預早開聲。N咁多款辣嘢當中,不可不試靈感源自劉師傅當兵時的地鍋大魚:「想當年,唔同籍貫嘅士兵個個行足五六個鐘,一停低就立刻紮營起爐,煮滾啲湖水就將食得嘅材料全部掟晒入鍋,加埋花椒、辣椒一齊煮,可能覺得肚餓喇,嗰刻簡直覺得係人間美食。」

地鍋大魚$108

𠵱家唔係紮營,所以唔會乜嘢材料都加入鍋,大魚灼熟後嫩滑無比,鍋湯底用泡椒、指天椒、花椒粒、貴州乾椒等煮成,入口麻辣帶鹹香,加上連爐滾住上,辣到滴汗。

班指蟹$168

班指即豬大腸,因似足古時男人戴的玉戒指而得名,名字夠詩情畫意,但食落一樣辣度十足,幸好回口帶酸甜,蟹肉夠鮮嫩。

辣子雞$88大盤

以指天椒及花椒與炸雞同炒,非常惹味,炒過的指天椒似足炮仗,入口香脆,嗜辣者可以之伴炸雞同食。

秧盆雞$70

秧盆雞即怪味雞,入口有齊麻、辣、香、鹹、酸、甜多種味道,雞件皮脆肉嫩,新春推出$388套餐包埋蟹相面、辣子蝦、湯及甜品,重有9折免加一優惠,抵食。

小辣椒(25719822)
地址:北角北角道33號B2舖
初三營業時間:11:00am-6:00am
座位:60個

■講到明無豪裝,不過圓枱方櫈加埋電視機,一樣坐得舒服。

醒胃香辣個個啱食

嫌四川菜的亡命大辣太刺激,泰國菜酸甜醒胃的香辣可能更對胃,「金象苑泰國菜館」今晚開到9:30pm,嗜吃辣香者不妨捧場。摸摸褲袋,大大叠利是大嚿過磚頭,反正慷他人之慨兼過節流流,就食餐豪啲喇,唔好就住就住,先嚟個魚翅啷口,再𡁻啖啖肉大蝦,Last食海鮮大滙埋齋,爽呀!驚辣?放心喇,為遷就香港人口味,菜式辣度點到即止,一家大細都啱食,味蕾一定無詐型。

辣椒膏大蝦$198

選用出名大隻、肉質嫩及膏多的泰國大頭蝦,肉味稍淡,但香濃的辣椒膏夠惹味香口,味道不太辣,適合一家大細。

鮮椰青冬蔭翅每位$198

初二開年飯食完翅赤口又食?新正頭豪啲無所謂啦,用檸檬葉、辣椒油等秘製的冬蔭功,味道帶酸,入口啖啖鮮椰肉。

菠蘿海鮮大會$148

海鮮有青口、蝦、魷魚及石斑塊,用紅咖喱、椰汁烹調而成的醬汁,咖喱味辣度恰當伴白飯食最好。

金象苑泰國菜館(21210111)
地址:旺角太子道西171號別樹一居地下及1樓
初三營業時間:11:30am-9:30pm
座位:225個

食甜品潤一潤

今晚食完飯打完十二圈,不妨直踩銅鑼灣「發記」食個靚消夜,自從「發記」喺銅鑼灣開新舖後更加就腳,過年食甜品又點少得佢,推介楊枝甘露同榴槤飄香,嗌交嗌到口乾咪啪番碗糖水潤吓喉囉。

榴槤飄香$25

去親發記必食,榴槤味極香濃,入口啖啖榴槤肉,加上好意頭的金黃色澤,食完財源滾滾來。

薰衣草蜜糖燉雪梨$36

新推出的秋冬滋潤燉品,薰衣草花香撲鼻,連日與親戚周旋後用作鬆弛神經一流。

發記甜品(28383066)
地址:灣仔謝斐道532號地舖
初三營業時間:12:30pm-2:00am
座位:40個

過癮糕點試埋佢

食完辣菜喉嚨噴火,食番啲特色糕點先算為初三畫上圓滿句號,坊間不少甜品店選擇提早開市,更將新年食到厭的蘿蔔糕、年糕以嶄新方式推出,包你聞所未聞。「Anytime無休館」重夠擔死玩埋蘿蔔糕天婦羅、串燒馬蹄糕加汁,聽落唔中唔西九唔搭八,但食落又的確幾搞鬼好味,自問想試新口味,撐呢間!

黃金馬蹄糕伴鴛鴦汁$32

串燒馬蹄糕賣相討好,可點朱古力及呍呢拿汁同吃,前者香濃後者幼滑,勝在不太甜,不怕愈吃愈膩。

蘿蔔糕天婦羅$32

打破蘿蔔糕非蒸即煎的宿命,以紫菜捲起蘿蔔糕,再蘸天婦羅漿炸香,入口外脆內軟,配以香濃的胡麻醬,口感新鮮。

杏仁脆炸紅豆年糕$28

年糕夾着玫瑰紅豆茸,外層再鋪滿杏仁碎後同炸,入口香脆帶杏仁香,更可嘗到年糕的煙韌感。

Anytime無休館(21483388)
地址:銅鑼灣翡翠明珠廣場1樓5號
初三營業時間:11:00am-12:00mn
座位:110個

相嗌唔好口

初三赤口,同枱食飯多嗌霎,輕則俾人寸兩句,重則好似張敬軒咁俾人開年,食嘢食出火者大有人在,好彩受害者唔係你同我……

整蠱娘親提早開年

「細個好百厭,專登整蠱屋企人,5歲嗰年嘅年初三去親戚屋企食飯,阿媽起身夾餸畀我食,我就拉走佢張櫈,結果阿媽成個人碌落地,我返到屋企就俾阿媽提早開年,打到飛天囉。」

張敬軒

夾餸夾到嗌交

「有次初三同朋友食飯,有個男仔好細心咁幫女朋友夾餸,到個女仔夾番畀佢食嘞,個男仔又好無厘頭咁話唔鍾意人夾餸畀佢喎,重無端端發脾氣㖭,我就梗係充當和事老喇,叫佢哋唔好耍花槍晒恩愛囉。」

飲茶飲出火

「試過年初三去酒樓飲茶,食物跌Watt不特止,叉燒包重硬到可以掟死狗!即時叫部長嘈一餐,部長竟然無動於衷,一家人暗啞底發誓唔再幫襯兼望佢執笠,估唔到過咗無幾耐間酒樓真係執笠!」

李彩華

搵食搵到黑面

「約朋友行街睇戲,之後有人提議食日本菜,有人話食越南菜,我就提議打邊爐,大家爭持不下嗌大交,最後我拗贏,班Friend初頭都面黑黑㗎,不過大家烚吓烚吓好快又無嘢嘞。」

梁靖琪

𢭃利是姊妹互片

「上年食開年飯,阿妹發現我啲利是多過佢,竟然一口咬定我偷利是,於是我哋一邊食飯一邊互片,認真唔老嚟,佢都唔明,家姐得人鍾意咪多啲利是囉,儍妹嚟嘅。」

鄧穎芝

枱底玩手指惹禍

「細個出街食飯,張枱高自己又矮,成日唔記得放對手上枱面,大人鬧極我又唔聽。新年食飯嗰陣大人就大大力用筷子敲我隻手,真係好痛呀,搞到我𠵱家食飯都唔敢喺枱底玩手指嘞。」

王秀琳

當雞子跌落褲襠

「試過去打邊爐,有個Friend飲大咗本身已經躁躁哋,點知隔籬枱唔知邊個唔生性,夾唔實嚿雞子一嘢飛落我個Friend條褲度,風頭火勢,我即時㩒住我個Friend,好彩最後打唔成交咋。」

侍應Yan

雞同鴨講愈講愈㷫

「試過有年年初三去大陸做旅遊節目,我諗住買花生糖,點知個店員服務態度奇差,大家又雞同鴨講愈講愈㷫,最後我叫佢同我磅晒一包二包花生糖,磅晒之後我又唔買,玩完佢先出番口氣。」

譚小環

踩場鬧事攞嚟嘈

「我哋個個廚師都食過夜粥,試過有年有客人帶出面嘅食物入店,聲大夾惡話我哋無嘢賣所以拎嘢入嚟食,我咪叫佢去第二度食嘢囉,搞事?我估佢唔敢啩。」

食店黃師傅