今日初三，又係一年一度豬朋狗友聚賭嘅好日子，今年特別人齊，大部份老友都留港度歲，唔係唔想出外遊埠，係因為前一排放假時已經遊咗，玩到攰兼使突晒，過年不如留番喺香港攤唞吓。
2005年尾至2006年頭，香港人大把假放，打從世貿周開始，普遍已出現HolidayMood，除了保家衞國的警察們，其他崗位的市民好似已經放軟晒手腳，橫掂又冇乜特別原因要快馬加鞭，地產樓市又牛皮，所以一切不如等過埋聖誕至講。
到咗聖誕，由於2005年經濟氣氛算係咁，執咗位起過庄之後嘅曾特首領導得又算係咁，所以市面一片算係興旺，周圍都係人，唔只旺丁，亦都旺財，零售業普遍生意有增長，好食嘅食肆亦大排長龍，食晚飯訂枱要分兩檔，就算係高消費地方，食完夠鐘都一樣要起身畀番張枱人，不過其實都有點擔心那道瘋狂加租的虛火，業主們一律以為租戶識屙金蛋，於是係咁取卵，不過新正頭唔講呢啲嘢，冇錯，去年聖誕與農曆年黐得特別近，聖誕電影都未落畫，賀歲片就已經上畫，HolidayMood一浪接一浪，根本未停過，啱啱講完MerryChristmas，眨吓眼就已經恭喜發財。
雞年係算係咁唔錯的一年，希望狗年更加唔錯，更加算係咁。