香港樂壇在過去一年百花齊放，其中樂壇大哥大姐陳奕迅（Eason）和楊千嬅，更在年初的頒獎禮上囊括多個獎項。趁着新正頭，又適逢赤口，他們大談對來年的展望，一直想行桃花運的千嬅希望覓得如意郎君，而即將註冊結婚的Eason則望與新人王側田合唱。
陳奕迅去年年中才全面復出，休息半年多的他更在頒獎禮勇奪傳媒大獎，而他的演唱會舉行在即，之後又將與女友徐濠縈共諧連理，認真好事多籮籮。
夥側田合唱
Eason趁着春節期間難得的幾天假期盡享天倫，陪伴準太太與女兒康堤，他說：「我會休息吓，重要陪吓個女，其實𠵱家成日都會想見佢多啲，佢真係令我人生轉變咗好多，做人積極啲，有時見到佢走嚟走去，聽見佢𠵱𠵱呀呀，好有生命力，個人都充滿energy。」
談到Eason的新年願望，他說：「我希望屋企人身體健康。」而事業方面，去年樂壇新人實力超卓，就連Eason也被這股樂壇的新勢力所感動，他直言希望與新人王側田合唱，Eason說：「我覺得○五年樂壇係豐盛嘅一年，希望○六年會更加精采，我都係樂迷，○六年我會繼續做多啲好歌。嚟緊我真係想搞吓合唱歌，好想同側田合唱。」
千嬅春節期間在港與家人共度，一如既往千嬅亦有大派利是，她笑說：「今年我同屋企人拜年，都會打吓牌，但係啲人唔係好鍾意同我打，因為我成日都拎起咗又放番低咁，打牌都係想攞下意頭。今年我都有派利是，一有人問我幾時輪到我派利是，我就即刻派封利是塞住佢把口。我覺得可以派利是係一種福氣，可以皆大歡喜。」而一直望行桃花運的千嬅更笑言今年會在家散放桃花樹的種子，將桃花種滿整間屋。
反串演狀元
今年千嬅則望衝出亞洲，希望可以完成灌錄國語碟的工作，她更將首次到內地拍劇，反串演狀元，與張國立和范冰冰兩位內地演員合作，她說：「其實今次都有新鮮感，要同啲咁有份量嘅演員合作，壓力都有啲，但係自己嘅心態就係唔知死，但唔係玩玩吓，一做就會上晒身。」
採訪：陳月媚、羅慧敏
攝影：林德雄
服裝提供：上海灘（楊千嬅）
BlancdeChine（陳奕迅）
