今日初三赤口，港人寧願留響屋企都唔想去朋友處拜年；不如叫埋三五知己，又或一家人圍埋大玩PartyGames，志在娛樂開開心心度過年初三，咁就解到悶兼唔怕傷和氣啦！
記者：陳偉林
攝影：Kenny、伍慶泉、陳偉林
ImageGirls&Boys：Algie、Sindy、Howard&Eric
喺屋企開Party，少不免圍埋玩吓遊戲，今日就精選多款好玩遊戲畀大家，有考腦力鬥智慧嘅大富翁，亦有郁身郁勢嘅體感遊戲，等大家發洩完咪冇咁易嗌交囉！
棋盤上行大運
好玩指數：★★★★★
大富翁早成經典，近年重推陳出新搞新嘢，趁住剛踏入狗年，食正意頭玩吓呢款狗狗大富翁！呢款Dog-Opoly嘅棋子相當之古怪搞笑，有貓有狗外，連跳蝨都有！過往嘅「命運」同「機會」，亦會應景地印上多款狗種，抽正自己心愛狗種，滿足感倍升！重有起屋起酒店改為起狗屋，個個努力起屋之餘，重可在棋盤上行個大運！
好玩指數：★★★★1/2
米奇、唐老鴨鬥𢱑銀，諗起都好笑。𠵱家重新出埋中英對照，玩起上來份外投入得多，同期新作重有恐龍世界同海洋生物等主題嘅大富翁遊戲呢！
比薩斜塔層層叠
好玩指數：★★★★1/2
層層叠玩得多，刺激有餘新意不足，不如試吓呢款比薩斜塔層層叠ShakyPisaTower，塔底好似不倒翁咁圓形，東歪西倒好易冧！玩家重要輪流逐一放上公仔，睇吓邊個唔好彩整冧個塔！睇住佢一時傾向對手、一時又側向自己，真係求神拜佛啲公仔唔好跌落嚟，玩落其實相當之刺激！
扮悟空出龜波氣功
好玩指數：★★★★★
龍珠套漫畫同卡通片同樣收得之餘，街機版的DragonBall電視遊戲亦大收旺場，而呢部家庭版的TVGame，最獨到係你只要戴上一對感應戒指後，便可以模擬片中主角孫悟空，又或者孫悟飯同比達，以其撒手鐧如龜波氣功攻擊敵人，還要模仿劇中各個主角，事前要做出各個指定動作方可以使用，勝在真實感重兼且可以消耗大量體力。
避對手兩頭搖
好玩指數：★★★★1/2
有乜咁好玩：出面街機只有兩枝控制桿畀你扭，又點似得呢部機可以畀你戴上真實的拳套，一嘗當拳手出拳咁好玩。
對電視擊全壘打
好玩指數：★★★★
有乜咁好玩：想打出全壘打，又或者想知道你自己的眼界有幾準繩的話，只要擺好擊球姿勢，拿起棒球棍真係恍如置身球場中。
店舖資料（初三照常營業）：
（a）玩具反斗城（29916222）
地址：九龍尖沙嘴海運大廈地下OTG23
（b）崇光百貨（28338338）
地址：香港銅鑼灣軒尼詩道555號
（c）JCShop（31022783）
地址：香港銅鑼灣時代廣場833室