新春喜氣洋洋，唔少團體趁噚日大年初二，走去煲呔新屋禮賓府外請願兼開年，提醒春風得意嘅煲呔咪忘記民間訴求。請願人士扮鬼扮馬，要財神有財神、要福娃有福娃，連精靈活潑嘅狗仔都趁狗年向煲呔訴苦。
狗年最惹笑又悲涼嘅請願行動，就係社區組織協會帶住班赤貧小朋友，扮成貧窮五福娃：屋屋、書書、車車、飯飯、藥藥，炮轟扶貧委員會冇料到，希望政府可以減低醫療收費、降低申請書簿津貼資格、提供交通優惠。佢哋高唱改編自《祝福你》嘅歌仔《多得你》：「多得你，在這新春裏，我冇錢買新衣；乜都冇，病咗冇錢醫，條命係算卑微」。唔知口口聲聲話自己都捱過窮嘅煲呔有乜感受呢？
關注動物組織108行動就發動三貓十一狗同特首拜年，賀禮係一包錦鯉魚糧，希望愛魚如命嘅煲呔關注吓加強虐待動物刑罰嘅問題。民主黨成員就扮財神，帶住仔囡出嚟請願，要求不斷叫人生三個嘅煲呔快啲減稅。
平日抬慣棺材嘅長毛就罕有咁向煲呔派利是，不過錢就無，係得條紅色嘅哲古華拉領巾，長毛話要煲呔記住權力係屬於人民喎。
咁多人請願都唔見煲呔出嚟接信，民協就索性搵人喺頸上掛個特大紙煲呔扮特首，要求政府快啲落實普選時間表同改善民生。
爆料熱線：29290000、27860099
報料傳真：26239278
報料電郵：[email protected]