今日初三赤口，亦係公眾假期最後一日，大家終於大條道理安坐家中，有番啲私人空間！橫豎「富」閒在家，最大娛樂真係莫如煲番套靚碟，尤其《如果．愛》新碟上架，有學友、金城武同周迅載歌載舞，陪你熱熱鬧鬧過新年！
記者：朱崇德
港產類
三男一女齊開腔
睇演員牌頭──張學友、金城武、周迅、池珍熙，集齊了中、港、韓、台4地的靚仔靚女；故事講周迅有一個不光彩的出身，後成為了大明星，在力圖否認過去之時，巧遇人生中最重要的兩個男人，大導演張學友及大明星金城武；更戲劇者，是三人要同演一齣戲，劇情和大家遭遇竟驚人相似；戲內戲外，已難分真假。
靚聲重現
電影特色之處，是罕有地使用有如《情陷紅磨坊》式大型歌舞拍攝，劇中各名男女主角都有開腔獻唱；由於是歌舞劇的緣故，今次DVD特別起用了DTS96/24靚聲版（96KHz/24Bit），須知一般CD音效取樣亦只得44.1KHz/16Bit，加埋擁有5.1聲道的環迴效果，靚聲程度可想而知。據知《如》最近重入選為奧斯卡最佳外語電影候選名單，無論得獎與否，港人都絕對值得撐！
店長推介
喺香港同類戲種真係唔多，尤其係咁大卡士同製作更係少之又少，足以見到編導嘅誠意。歌舞連場雖做到熱鬧同氣勢，不過跟荷李活同類劇比較始終稍遜。
《如果．愛》普通版$85/特別版：$130（a）
麻雀奇牌奇局
好多配角都勁搞笑，加埋今集勁多入門式奇牌奇局，真係幾學到嘢，今日初三赤口，唔想喺雀枱上應節鬧赤口，《雀》或者可以過吓大家心癮。
《雀聖2自摸天后》$69（c）
林狗激扮阿Rain
早排林狗林海峯搞棟篤笑，鬼馬惹笑場場爆，尤其幾幕扮勁舞天王阿Rain，簡直上身一樣咁激！DVD新碟剛上架，買隻返屋企笑餐飽都夠過癮啦！
《林海峯棟篤笑》$179（a）
外語片
阿婆媾仔笑爆嘴
《麻婆島》出咗2個星期，去貨情況仍強勁！故事講黑社會大佬中了千六萬彩票，但竟然俾一個冇有識死嘅𡃁妹偷走咗，為奪回彩票，一賊一警的特別組合，決定直搗麻婆島——𡃁妹的老家！可惜等緊佢哋嘅唔係花碌碌的銀紙，而是「封塵」多年嘅5個阿婆！
配音啜核
《麻》的鬼馬處搵嚟葛民輝、朱咪咪同元秋等口賤之人做配音。全劇都係以粗口＋鹹豬手掛帥！當中最搶眼嘅當然係阿葛聲演嘅姣婆四，成日借啲意抽水、幫人洗八月十五之餘，成日都語帶相關，賤到極點；元秋聲演的爛口蓮，真係粗口句句不離口（會有「嘟嘟」聲），字字鏗鏘自然、發自內心，好明顯久經訓練！
《麻婆島》$95（a）
店長推介
真係笑到唔停得口！冇冷場，幕幕笑位，加埋葛民輝抵死配音，新年開開心心想睇笑片，一定揀佢！
整蠱細路獎門人
戲中用盡種種怪方，整蠱嗰班冇童真嘅超級細路，真係不論大人細路都有反省空間。
《朱古力獎門人》$145（b）
睇至強特技
故事人物耳熟能詳，石頭人、橡筋人、隱形人同火人，細路哥時大家都睇得多喇，呢次真人版再加超強嘅電腦特技，已經值回票價！
《神奇4俠》$159（a）
合家歡動畫
數碼修復超靚版
《反斗奇兵》係首套叫筆者看見CG威力的動畫，當年大人細路都睇到拍案叫絕，操刀手彼思動畫更因此聲名大噪，從此扶搖直上！今次重新推出數碼修復「靚執版」，令原本勁靚嘅畫面更Sharp，真係令好多碟迷都忍唔住手一買再買！除咗畫面外，重首度加埋dts靚聲效，好似大班玩具奇兵過馬路一段，炒車聲夠晒環迴、重低音亦轟到「澎澎聲」！加上孖碟都係賣$179，抵玩！
《反斗奇兵2合1珍藏套裝》$179（a）
店長推介
原作已經好無敵，重新經過數碼修復技術執過，畫面真係超完美，尤其放上投影機上播放時，高下立見！
大玩黑色幽默
電影雖以人鬼作題材，不過並未令人感到過份死亡意識，反而對愛的闡釋同一幕又一幕的超爆笑場面，叫人睇到唔放得手！令人回味係屍新娘千辛萬苦得到老公，卻因愛而放他回陽間，當中之深情難怪令入場者感觸流淚。
《怪誕屍新娘》$119（a）
無國界動物
雖然笑料好西方，不過一班無國界動物做主角，一樣睇得開心！一班企鵝每次出場必令人捧腹。
《荒失失奇兵》$135（b）
系列類
經典魔幻大長煲
《魔戒》系列，可以話開創了魔幻文學潮流，引伸到後期好多RPG遊戲、電影同小說等瘋狂猛跟！雖然每一部曲都長達3個鐘，不過相信仍有好多《魔戒》迷想一氣過將成套三部曲睇晒，感覺當然連貫好多啦！三部曲加埋成十個鐘，真係超級大Project，幸好大家唔使好似早排喺戲院咁，連廁所都要忍住唔去咁連睇三集，因為《魔戒三部曲豪華完整版全集》已經推出市面，DVD機絕對可以為你「個人需要」而隨時暫停！
店長推介
如果講一生中必睇，《魔戒三部曲》一定入圍，三集齋戲都已經10個鐘，加埋Making絕對係新年大Project！
《魔戒三部曲豪華完整版全集》$749（a）
翻煲《迷》解謎
雖然第二輯美國嗰邊播緊又話暫停唞「寒假」，吊晒癮，不過大可趁農曆年「吉」檔翻煲第一輯，或可發現蛛絲馬迹，解開謎一樣的《迷》。
《迷》第一季$439（a）
加長足版《24》
雖然電視集集追，但又點及成套煲咁一氣呵成！DVD中重可以自選觀看其中13個單元嘅加長版，絕對足版好多！
《24》第四季$439（a）
好意頭賀年片
初三碟舖開市啦！
（a）UFO（25738019）
地址：香港銅鑼灣恩平道50號地下
營業時間：11:00am-1:00am（照常營業）
（b）CDWAREHOUSE（21750866）
地址：沙田新城市廣場
第一期7樓705號舖
營業時間：11:00am-10:00pm（照常營業）
（c）節拍（23903129）
地址：旺角亞皆老街64-70號地下D舖
營業時間：24小時（照常營業）
HMV（23020122）
地址：尖沙嘴漢口道17號
營業時間：9:00am-11:45pm（照常營業）
匯點（28347488）
地址：銅鑼灣駱克道535號
營業時間：24小時（照常營業）
正影音專門店（27871878）
地址：旺角洗衣街71號地下
營業時間：10:00am-2:00am（照常營業）
