周汶錡每逢過年都會到寺廟參拜，今年她到大嶼山寶蓮禪寺誠心上香和買風車轉運，祈求狗年事事順境。愛情方面，堪輿家蘇民峰指生肖屬虎的周汶錡要在這兩年好好把握姻緣，萬一錯過，便要等多十年才找到真命天子。
名模周汶錡（Kathy）日前穿上新衣，到大嶼山寶蓮禪寺上香，又到天壇大佛一遊。到達寶蓮禪寺，Kathy立刻買風車和香燭，問她買風車是否希望轉走去年的是非和小人？Kathy笑說：「其實我唔介意報紙同雜誌嘅報道，最緊要唔好影響我嘅工作同屋企人，我都冇放喺心上，亦唔需要澄清。」
多留意身邊人
今次是Kathy第二次到大嶼山的天壇大佛，她一口氣跑上百步梯，並說：「其實我冇特定嘅宗教信仰，不過每逢過年，都會入廟拜神祈求平安。去世界各地旅行，都入鄉隨俗，入廟拜神，今次係第二次嚟到天壇大佛，上一次係十年前為外國雜誌拍照。」
Kathy與杜德偉分手兩年，感情一直冇着落，堪輿家蘇民峰指生肖屬虎的Kathy要於這兩年內好好把握姻緣，如果錯過，便要等十年才找到真命天子，Kathy聽後即說：「咁就要快啲搵番個啦！我都覺得之前兩年太注重事業，最緊要隨緣，會多啲留意身邊嘅人，媽咪冇催我，要搵到合適嘅對象㗎。」
助山區童脫貧
談到狗年大計，Kathy說：「今年初會推出第二本旅遊書，希望事業方面可以有多元化發展，至於早前提過嘅珠寶設計課程，我希望今年到英國實踐，目標係推出個人珠寶系列。另外，我會繼續做多啲善事回饋社會，希望有一日可以用自己個名建小學，幫助山區小朋友脫貧。」
採訪：JessicaNgan
攝影：EdwardChou
服裝：上海灘
