赤口，不宜外出向親朋戚友拜年，不過無理由屈喺屋企賭天光㗎？去沙田車公廟轉風車望狗年風調雨順喇，不過買返屋企嘅風車，千祈咪當佢垃圾咁玩兩玩就掉，因為據堪輿學家麥玲玲話：「財來自有方，風車擺啱吉位，財運自會滾滾而來呀。」插得應，話唔定下期金多寶有你份。
記者：盧家蕙 攝影：何家亮
模特兒：Lin、Bee（Salvador）
風車擺正北同西南位
風車，簡直係迎新年的吉祥物，無論你行車公廟買傳統風車又或者行年宵買咗個爛鬼塑膠風車，都唔應該將風車亂咁放，因為返屋企擺得四正都可以增加財運！搵個吉位安頓佢，隨時令你今年發過豬頭，搵個盤滿缽滿，麥玲玲教精你：「善信去車公廟多數會買風車，可以要求廟祝喺神壇前念吉語，然後帶返屋企擺放喺狗年財位（正北）同喜慶位（西南），咁就可以增強運勢。」咁我屋企正北位同西南位都係牆，我又想睇住佢吹吓轉吓叮叮噹噹喎，放窗口位又得唔得？「都得，不過放喺正北或西南嘅窗口位會更好。」收到未？師傅提醒大家，若願望靈驗，記得要在同年的農曆十二月之內還神，答謝神恩，切忌忘恩負義呀！
拜神冷知識
1.拜祭車公無指定貢品，鮮花、清香、元寶隨意便可，蠟燭則不必，因為廟內禁止燒蠟燭及不設化寶爐。
2.麥玲玲話：「貢品可因應個人喜好而定，齋菜、燒肉、甚至糖果都得。」咁即係我至愛嘅熱浪薯片同可樂都得啦！
3.求財者或從事勞動行業者拜車公尤其靈驗。
4.參拜者只要清心，毋須清身，即係話唔使齋戒沐浴咁大陣仗喇，參拜時只要保持心境清淨就得喇。
車公係宋末大元帥
根據中國曆法，每年有4個車公誕，正月初二係正誕，又稱「頭誕」，不過唔少市民都會趁今日年初三先去車公廟參拜祈福，無謂拜年搵交嗌吖嘛。車公廟紀念嘅神靈係宋朝名將車公，籍貫江西南昌五福，因平定江南之亂有功，被封為大元帥；後來蒙古大軍南侵，宋軍節節敗退，宋帝昺喺左丞相陸秀夫護駕下逃難來港，當時車公亦護駕南來，可惜途中病逝，鄉民俾佢嘅忠直英勇感動，死後奉若神明，喺西貢蠔涌建車公古廟供奉。
車公個孫重響朵
車公廟建於明朝末年，有400幾年歷史，現存車公廟於1994年改建而成，原本古廟位置喺現今車公廟背後，平常唔會開放俾市民參拜。之所以起呢間廟，據聞同一場瘟疫有關，話說明末崇禎年間，新界各地突然出現疫症，又以沙田一帶災情最嚴重，村民求神庇佑，希望請蠔涌車公出巡沙田趕走疫症，可惜傾唔掂數，西貢村民唔肯放神，認為車公一定要鎮守蠔涌，不過始終人命攸關，只肯俾沙田村民帶走車公孫兒嘅神牌，神牌出巡一樣顯靈，點知兩爺孫一樣法力強勁，沙田瘟疫3日後消失，村民為答謝神恩，所以喺𠵱家嘅大圍起車公廟供奉嘞。
參拜有步驟
做乜都好，最緊要有誠意，何況求神？今日車公要應付N咁多個善信，個個善信又N咁多要求，無嚟準備求其入廟轉吓風車就閃，車公睬你都嫌費事喇，所以一係唔拜，要拜就唔該跟足麥玲玲教落的參拜步驟，收唔收到？
1.校啱吉時
唔該早啲起身出發，初三參拜吉時分2段，分別係7:00am至9:00am同11:00am至1:00pm，不過不宜肖虎人士，生肖相沖者最好另擇日子參神。
2.穿紅戴金
唔該翻箱倒篋摷番件似樣啲嘅衫入廟，顏色方面當然愈Sharp爆醒神愈好，紅、橙、黃、金色等都有助「搶旺」，計我話着埋紅底橫入廟無衰。
3.買車公衣
想慳啲，可以喺紙紮舖買定車公衣同大中小或線香入廟，車公廟裏面當然有得賣，不過價錢貴兩三成，一句到尾帶定足夠盤川喇。
4.揀風車
買番個風車帶入廟，沾吓啲靈氣都好嘛！風車都幾海鮮價吓，感覺上Size同價錢成正比，由幾十蚊至幾嚿水不等，造型圖案顏色都幾千變萬化，梗有一個啱你心水。
5.主廟外點香
先喺主廟外上香，簽完香油記得畫番隻龜，廟祝自然會大大聲祝福你，較大嘅香燭應該插喺廟前大香爐，唔好儍吓儍吓拎入主廟。
6.廟外廣場參拜
之後去廟外廣場參拜，唔少善信會鋪晒報紙喺地邊摺衣紙邊燒香，重帶埋齋菜、燒肉或甜點供奉車公，參拜後就入主廟誠心向車公像祈福，再上3支香，千祈唔好多。
7.轉風車
戲肉嘞，廟內有一整排銅製風車，記得以順時針方向轉風車，轉一圈夠晒數㗎喇，等風車自然停定後才好離開，咁就可以運轉乾坤喇。
8.打鼓
轉完風車，唔好忘記敲打神鼓，打鼓係話畀車公聽你曾經許願，而此舉亦有壓病、辟邪及趨吉之效，有心嘅話，離開前再添番啲香油啦。
9.化寶
沙田車公廟唔可以親自化寶，善信只可以將車公衣等放進廟內「聚寶車」，待廟宇職員代為化寶。
10.求籤
拜車公唔一定要求籤，要求籤就入主廟誠心下跪，一籤問一事，之後去解籤處拎籤紙，唔好懶醒自己解，畀錢勞煩解籤師傅喇（籤紙每張$5，解籤每張$10）。
善信求啲乜？
車公廟
開放時間：7:00am-6:00pm
交通：大圍火車站「車公廟」出口，到車公廟路左轉北行，過行人隧道後，便抵車公廟。
