赤口要收口？點得㗎！好似貼錯門神嘅Algie同Patrick，約出嚟嗌吓交應吓節，但年年如是都會悶，一於喺屋企嚟個四川菜，辣椒多過雞嘅辣子雞加埋鋪咗成層辣油嘅沸騰魚，肯定食到辣氣攻心，到時火氣得到發洩，再參考一眾名人名廚嘅解辣秘方，呢個新年自然高潮迭起啦！
記者：趙善怡
攝影：陳盛臣
Model：Algie、Patrick@TheGroup
示範：黃師傅@四姐川菜（28022250）
地址：灣仔駱克道285-291號高華大廈2字樓
三級辣—辣子雞
終極挑戰：椒多過雞
辣度：★★★★★
火辣價：$25/4人
需時：15分鐘
嘩！點解成碟餸都好似辣椒多過雞嘅？不如改名叫做辣椒雞或者椒中尋雞重貼切啦！值五隻辣椒嘅佢果然實至名歸，雞肉炸得香口之餘，從裏到外都充滿着乾辣椒之香，睇到都吞咗啖口水！
材料：雞肉半磅、乾辣椒3/4碗、花椒1湯匙、大葱1條切粒、薑3片、蒜頭2顆切片
醃料：豉油11/2茶匙、糖半茶匙、生粉1茶匙
煮法：
1）先將雞肉用醃料稍醃後，起油鑊將之炸熟。
2）另起油鑊，將薑及蒜片爆香，加入花椒、乾辣椒，炒香後把炸香的雞肉放回鑊。最後落大葱粒，炒勻後上碟。
3）在辣子雞面上撒上芝麻便成。
至辣貼士
Patrick：「個賣相係好靚，不過就feel到好辣囉！師傅話辣椒多過雞係呢味辣子雞嘅特色。重話若果想啲雞再香口啲，可以落多啲孜然粉喎！」
二級辣—沸騰魚
辣油成層厚
辣度：★★★★
需時：20分鐘
火辣價：$40/4人
何為沸騰魚？我只係見啲辣椒同花椒浮晒喺層辣油之上，啲魚喺邊？原來啲魚沉晒底，面上邊層油原來係用嚟保溫，咁咪唔怕凍咗唔好食囉！師傅又認真夠「體貼」喎！
材料：龍脷柳2條、乾辣椒1/2碗、花椒11/2湯匙、薑2片、蒜頭1顆切片、豆瓣醬11/2湯匙、新鮮辣椒2隻切碎、紅薯粉1/3斤、豆芽1/3斤、辣椒油2湯匙、生油1湯匙
醃料：生粉1茶匙、鹽1/2茶匙、水少許
煮法：
1）起油鑊，爆香豆瓣醬，加入水煲滾後，放進紅薯粉及豆芽煮熟。
2）撈起紅薯粉及豆芽，用其湯浸熟已醃過的龍脷柳。
3）將龍脷柳連湯倒進上碟用的鍋內。另起油鑊，將辣椒油、生油燒紅後，落花椒、乾辣椒、薑、蒜頭、新鮮辣椒，爆香後淋上魚湯面便成。
至辣Tips
Algie：啲魚好滑呀！師傅同我講原來先將魚用生粉同水醃一醃，咁煮出嚟嘅魚就會好滑㗎啦！
一級辣—泡椒嫩牛肉
送飯Perfect
辣度：★★
需時：15分鐘
火辣價：$30/4人
咦？個樣好精緻喎，係唔係車厘茄炒牛肉呀！……嘩！點解啲車厘茄會咁辣嘅？乜原來係泡椒嚟㗎！呢碟餸濕濕哋，加上啲牛肉又炒得好嫩滑，用嚟送飯就最啱！
材料：牛肉12両、泡椒12顆、薑3片、蒜頭2粒切片、豆瓣醬1湯匙、野生椒3隻切碎、西芹1條切段
醃料：鹽1/2茶匙、生粉1茶匙
調味：糖1茶匙、醋11/2茶匙
煮法：
1）將已用凍水沖過及已醃過的牛肉下滾水弄熟。
2）起油鑊，將薑片、蒜片、泡椒、野生椒及豆瓣醬爆香。
3）落西芹段及牛肉，並加入調味，快速兜勻後，隨即上碟。
至辣Tips
Algie、Patrick：啲牛肉先拖一拖水，咁之後就唔使炒咁耐，煮出嚟嘅口感咪無咁韌囉！
過冷河之選
開水浸娃娃菜
需時：20分鐘
降溫價：$8/4人
食咗咁多辣嘢，一定要食番啲清淡嘅菜餚去清一清味蕾同減輕一下胃嘅負擔！千萬不要看輕呢碟開水浸娃娃菜，誤以為它真的是如此簡單同平凡。其實要將菜烚得青綠就最考功夫，快啲跟師傅學吓嘢啦！
材料：娃娃菜2棵、薑3片、蒜頭2粒切片、鹽及雞油適量
煮法：
1）先將娃娃菜沖洗乾淨，將整棵菜一開四。煲起一鍋熱水，放進薑及蒜片，使之出味後撈起。
2）投進娃娃菜，待其熟透後，撈起上碗。
3）在剩餘的菜湯中加入鹽及雞油，滾起後將之淋上娃娃菜面即成。
降溫Tips
Algie：呢碟菜就最啱我食！……吓?!乜有落雞油㗎？又唔多覺喎！但係如果我想喺屋企整，又點搵雞油喎!?
師傅：阿媽用嚟烚雞嘅水咪有雞油囉！烚完雞再用嚟烚菜，夠晒環保㖭呀！