老外拜年：<br>寫字搓角仔過4關肥彭同鄉最醒

老外拜年：
寫字搓角仔過4關肥彭同鄉最醒

大家齊齊跟我講：「鳥敗阿花斯朱奇，下芝那維亞。」咪以為我亂寫一通，其實這是拜年的祝福語，於葡萄牙語中是「馬到功成」的意思，由來自保加利亞的Silvia教授，但係點解要喺新年學外語先？因為夠創新、夠搞嘢，今日一次過搵嚟4位來自世界各地嘅西人，齊齊闖4關過新年。經過測試，似乎英國人最熟悉過年習俗，唔通經過殖民地光陰，中國傳統當真給宣揚了不少？

記者：梁學文、黃若茵
攝影：林栢鈞
模特兒：Rafael、Callie、Gigi、Silvia（StarzPeople）
服裝提供：上海灘　全盒食物提供：奇華餅家

揸毛筆姿勢錯晒喎！

第一關寫揮春考書法

揮春是中國特有的習俗，以簡潔文字抒發願望，紅噹噹嘅對聯更是有助增添春節氣氛，是以每家每戶總會貼上幾副。今次教過揸毛筆的手勢後，就叫大家將墨汁一揮，即試寫中、西式賀語，睇吓佢哋有冇寫書法嘅天份先。

Callie

英國+印度+中國混血兒
來港幾耐：6個月
自創揮春寫啲乜：快快樂樂
讀音：樹華爺安（法文）

■唔知Callie係咪有書法天份，但起碼4隻字夠整齊清楚，再睇埋其餘3人嘅作品後，你就知冠軍非佢莫屬。

Gigi

加拿大人
來港幾耐：1星期
自創揮春寫啲乜：身體健康
讀音：咕蝦芙（英文GoodHealth也）

■Gigi話見過中國人寫書法嘅手勢係咁撩，於是就嚟個有樣學樣，結果個「體」字變左「骨」、「星」二字，「康」字則變了「隹」字，草書變咗鬼畫符。

Rafael

巴西人
來港幾耐：1星期
自創揮春寫啲乜：新年快樂
讀音：芙俐思阿樂樂福（葡萄牙文）

■字體好健壯噃，直頭龍飛鳳舞㖭！睇吓寫乜先，「身體健……」，請問你個「康」字去咗邊呢？

Silvia

保加利亞人
來港幾耐：1個月
自創揮春寫啲乜：馬到成功
讀音：鳥敗阿花斯朱奇，下芝那維亞。（葡萄牙文）

第二關創意包角仔

寫完揮春就包角仔，包之前先問吓老外們知唔知點解要包角仔，不過無一個識答。其實炸角仔就代表家運興旺，因為食物喺油炸嗰陣會脹大兼且油氣豐足。解釋完，大家齊齊試吓包，睇吓邊個包得掂。

■齊齊開粉，睇吓邊個最快可以完成先。

■Gigi包咗個心出來，今日唔係情人節喎。

■Rafael搓咗好耐都搓唔出樣，最後求其揑埋成嚿就算，佢重話：「我想整尊佛，不過時間唔夠整唔到！」算啦，解釋即係掩飾，人少少咪認吓低威囉！

■見到Rafael「尊佛」人人都忍唔住笑。

結果：Silvia勝！

■一開粉，只見Silvia包得幾有板有眼，重教埋隔籬位點做，三兩下手勢就經已搓好粉，再將啲餡放入去就差唔多完成！

第三關求神問卜篇

到了大年初一，就算你唔到黃大仙同人迫，家中總會上香拜神求好運。今次就考吓眾人IQ，齊齊動腦筋，估吓寺廟中求神問卜最常見嘅工具點樣用。

Q1.風車的意思是甚麼？

勝出者：冇人識答！
答案：轉運、帶來好運

■Gigi好有科學邏輯咁話：呢個風車係要嚟測風向嘅！

■於Silvia的家鄉中，每當大人以風車打過小朋友的肩膀後，小朋友便可收到金錢，也就是我們的「利是」。

Q2.籤筒內的竹籤應如何抽出？

勝出者：Callie！

■Gigi一聽到這是測未來的工具時，抽得萬分緊張，可惜，跟Rafael及Silvia一樣，抽籤嘅方式都係錯。

■輪到Callie，佢好淡定咁教大家正確嘅求籤方法，唔通佢成日都去黃大仙？

Q3.拜神時潛水鏡有乜嘢用？

勝出者：又係Callie！

■個個都估唔到，重要問攞貼士：「廟入面咁大煙……」「Oh，我知喇！」又係Callie答中，咪就係要保護對眼，唔怕俾煙攻到囉。

第四關全盒大對決

新年擺全盒除咗係因為要招呼親朋戚友，其實重有意思嘅，古代嘅全盒分三層，第一層就要擺中式糖果，好似糖蓮子咁，寓意連生貴子。第二層就放賀年油器，好似油角同煎堆咁，寓意家運常旺。第三層就有賀年食物，好似生菜咁，取其諧音「生財」。時至今日就簡單啲，大家鍾意擺咩都得，不過當然要應節啦。枱面有嫁女餅、老婆餅，重有橙呀雞蛋呀，有咁多樣嘢揀，唔知佢哋會擺咩呢？

結果：得Callie啱！

咁多個，最離譜係Rafael竟然揀兩個橙！呢個回合好明顯又係Callie贏啦。

總結！

總結4個回合，Callie贏咗3個，佢梗係全場總冠軍啦。拆穿咗，原來Callie有1/4中國血統，阿爺係中國人，難怪佢可以咁得心應手嘅！