洪朝豐昨日穿上一身粉紅裝大鬧志蓮淨苑，他與香港國際人會會長林卓斌，還有他的契仔及契仔母親，帶了一幅佛像與一把劍到志蓮淨苑，洪朝豐說：「我諗住大年初一攞幅佛像嚟禮佛，等遲啲拍賣嘅時候，可以開高啲價，點知佢哋唔畀我去喎，重搵三個保安攔住我，點解唔畀我入去？」
洪朝豐引來不少人圍觀，警衞要求他離開不果後，報警求助，當洪朝豐得悉後亦即報警，並說：「我唔識報警咩？喂！我要報警，志蓮淨苑唔畀我禮佛呀，重搵人攔住我，你哋三分鐘可唔可以嚟到，唉吔，有人打我呀，快啲嚟，好痛呀。」
賴死唔走
其後有兩架警車到場，了解事件後便離去，而洪朝豐則繼續在寺院門外，與路人傾談，不願離去。
採訪、攝影：胡比、馬建華