大年初二，跟各位讀者拜個年，祝大家身體健康，一家和氣，出入平安，豐衣足食，開開心心。
年紀越大，身體健康便成為口頭禪，搵幾多錢都係假，身體一定要健康，食得招積，瞓得舒適，玩得出色都全靠一副健康嘅偈，所以祝大家有健康嘅身體。
古語冇講錯嘅，修身，齊家，治國平天下，治國平天下唔係太關我事，但修好自己副偈後，最緊要係家人親戚朋友都健康，一家人上上下下健康快樂，才能有好的精神狀態去面對營營役役的生活，每天下班回家，一家人和和氣氣𠵱起棚牙食餐屋企飯，好過攞個大紫荊勳章多多聲，屋企係一部叉電機，每日喺社會做到冇晒電，返到屋企卸下戎裝叉叉電，第日精神煥發再搏過，做嘢畀心機亦知道為乜，咪就係希望一家人成日𠵱起棚牙囉。
香港是一個金錢掛帥的地方，報章雜誌刊登名人故事時都以身家若干作一個度量衡單位，其實錢嘅嘢邊有得計幾多係多，幾多係少，開心最緊要，與其同篤眼篤鼻嘅人一齊食兩個頭鮑魚，不如跟至愛親朋一起嘆齋鮑，過癮得多。與其捱更抵夜日搏夜搏為咗買多個歐洲字母名牌手袋或者為隻手加隻撈，不如周末攬住至愛瞓晏啲，然後去長洲嘆下午茶。
祝大家健康，開心；其他，求其。