昨日係大年初一，香港市面一片喜氣洋洋，煲呔加三司就喺官邸同記者團拜。民主黨嘅肥仔明噚日去睇賀歲盃，特登捧香港隊場，唔使去幫民主黨扮財神。有去睇波嘅市民就同八方報料，話肥仔明塊面好似有啲一撻撻，唔知係咪做緊激光去斑呢？
咁八方梗係要問吓肥仔明係咪真嘅，肥仔明就同八方證實咗係嘅。肥仔明話其實係老婆催佢去做激光，因為太太做過、個療效幾好，佢終於的起心肝趁長假期，呢啲唔使拋頭露面嘅時候做，咁放完假就可以用全新嘅形象見人。肥仔明初五同初七都要幫民主黨扮財神，向市民派朱古力金幣，好彩到時有啲鬚遮吓塊面，咁就無咁肉酸啦！
八方想搵肥仔明影番張相，等佢做完激光後對照，睇吓係咪真係靚仔咗，但肥仔明死都唔肯影，真係冇佢辦法啦。
多人趁年假幫襯
但原來香港都有幾多人，趁新年假期前做激光喎。肥仔明話，佢年廿八喺中環做，成個下晝都排滿晒人，但成個過程好快，只係搽啲麻醉藥喺塊面度，過半粒鐘左右就做完，等多十日八日再去一次，咁就OK晒啦！不過老人斑呢家嘢係根治唔到，如果遲啲又曬吓塊面，到時又會出番晒嚟嘞！
講番嗰場賀歲盃，肥仔明原來未睇完香港對丹麥就已經走咗，因為香港實力真係唔得，冇得同丹麥踢，所以寧願早啲返屋企休息好過！
傳真︰2623-9278
電郵︰[email protected]