放新年假，唔係拜年就係到朋友家麻雀耍樂。年初一已經做晒？唔緊要！各大商場在新年期間都搞咗唔少活動吸引人流。好多重係第一次喺香港表演，唔想喺屋企悶就梗係要出街趁吓熱鬧，感受一下新年氣氛。睇完表演，記得到商場嘅賀年靚景影吓相，為新嘅一年作個好開始啦！
記者：許維雅、曾靜茵
攝影：周旭文、何家亮、楊錦文、曾靜茵
Model：Darren、Sandra@puremodel、Cat@Salvador、Bianca
真材實料雜技團
「廣州雜技團」以往兩年到太古城中心表演都非常受歡迎，今年重動員40人上陣，果然不負眾望，所有觀眾都拍案叫絕，反應十分熱烈。廣州雜技團獲獎無數，如第14屆比利時國際雜技比賽及第6屆全國雜技比賽都得到金獎、第29屆蒙地卡羅國際雜技比賽的「銀小丑獎」等80多項殊榮，他們更曾為不少國家級元老表演，絕對是實力派。不過，最值得留意卻是雜技員表演任何節目都沒有安全措施，每一下難度動作都令人心驚膽跳。
睇得入神
地點：太古城中心
日期：即日至2月5日，每日3場
交通：太古地鐵站太古城中心出口
詳情：www.cityplaza.com
電話：25688665
金光閃閃扮千手觀音
首度來港獻藝的殘障人士表演多個節目，以火柴盒吹奏音樂和一班聾啞小女孩表演「千手觀音」舞蹈最受歡迎。「千手觀音」小女孩着住金光閃閃嘅舞衣，觀眾爭相影下金光觀音，一沾旺氣。
地點：沙田新城市廣場
日期：今明兩日，每日兩場（3:00pm及6:00pm）
交通：東鐵站沙田站出口
HipHop醒獅
舞醒獅是每年新年的重頭戲，好多時都可以吸引到一家大細，但要年輕一族都有興趣，懂得以美式HipHop文化融入中式傳統舞獅表現中，的確是不錯的創新表演。
地點：時代廣場
日期：今明兩日，每日兩場（3:00pm及4:30pm）
交通：銅鑼灣地鐵站時代廣場出口
少數民族歌舞表演
中國貴州省「凱里民族歌舞團」會表演中國各少數民族舞蹈和音樂，如苗族、侗族、布衣族、水族及白族等，亦可分享他們的賀年習俗，唔使北上都可認識多一點點。
地點：新元朗中心
日期：今日2場（3:00pm及6:00pm）
交通：元朗輕鐵站上蓋
8大賀年靚位
靚位1 久久金連金@港海城
踏入丙戌狗年，海港城就唔用狗做布置，特意用上9999個巨型金錢來串成13幅垂簾，除了遠望都覺金碧輝煌外，楊天命重指出，呢個布置亦有長長久久、盡收八方財之意。另外，長廊亦參照頤和園設計而成，內有33個燈籠，代表「三三不盡」之意。
靚位2 千燈添福壽@青衣城
今年以「宮廷綵燈會」為主題嘅青衣城，有成千盞燈飾放在商場內，最壯觀嘅莫過於288盞掛喺大堂天花上嘅綢緞燈，大大小小嘅紅燈籠垂釣在半空恍如「放天燈」一樣，寓意添福、添壽及添丁；另外在大門口還有一盞高達18呎的八角亭式走馬燈「燈王」，夠晒輝煌。
靚位3 6大奢華景點＠德福商場
一個商場有6個唔同嘅景點可以話落足本，今年德福商場就以中國宮殿為設計藍本，其中喺二期嘅扶手電梯上有88條人手鑲嘅錦鯉，寓意「鯉躍龍門」，啱晒學生哥及打工一族。
靚位4 水禾田創作＠荷里活廣場
荷里活廣場今次就邀請咗水禾田創作咗隻百變醒目狗，無論喺商場嘅大堂或者樓梯，都可以見到佢嘅出現，當中有啲重融入咗立體圖片動畫概念。
靚位5 巨型金魚＠朗豪坊
朗豪坊嘅通天梯掛上超過150米長的桃花燈飾外，重會有3條長達5米的巨型遙控氦氣金魚喺你頭頂游來游去，不過睇還睇，搭電梯時記得扶實呀。
靚位6 桃紅狗狗桃花陣@apm
喺apm嘅大堂就有個逾千呎嘅《祥旺潮狗》桃花陣，當中巨型嘅桃紅色狗狗內綻放咗1萬多朵桃花，鋪成一條長45呎的桃花長廊，畀你影餐飽；另外喺桃花陣入面重展出咗EricSo06年嘅最新作品。
靚位7 財源滾滾金錢樹＠時代廣場
喺時代廣場嘅2樓大堂就放咗兩棵高5呎嘅金錢樹，樹上掛咗逾百個金錢，寓意「財源滾滾」，想新一年財運縱橫嘅話，記得去影番張相喇！另外商場嘅正門重有一對高40呎嘅巨型揮春，想睇清楚，記得行遠少少啦！
靚位8 許願樹拋寶牒@東港城
許願樹正在休養生息，想重拾拋寶牒嘅樂趣，就可以到將軍澳嘅東港城，因為場內特設咗一棵高18呎嘅許願樹，只要購物滿$100就可以寫上祝願拋下寶牒啦。
