劉德華是公認的大忙人，每年最輕鬆的，相信只有農曆年的幾日假期，不用工作定必會留港與父母團年。華仔是香港海洋公園保育基金保育大使，推廣野生動物保育的工作，今年適逢狗年，故他探望海豚之餘也順道看看海狗，華仔說：「海豚代表和平，氣氛祥和啲，大家做嘢生活都開心啲，咁咪就係如魚得水囉。」
出路遇財神
華仔到達海洋公園後才知原來沒有海狗，只有海獅，不過工作人員告訴他，海獅在某些國家叫做海狗，華仔說：「我未同過海狗做過朋友，未握過咁大隻手，佢伏喺我膊頭嗰陣重喺我條頸度噴氣，後來先知佢伸埋條脷出嚟，好鬼馬。」
華仔探望海洋生物期間剛好碰到福祿壽及財神在拍賀年廣告，他還收到財神派的兩封大利是，他笑說：「出路遇財神派利是，已經好正，重有福祿壽，重要係踩高蹺嘅㖭，代表今年多福多祿多壽。」
飛機搭到驚
對於過去一年，華仔總結是「工作工作再工作」，因四出工作而患上飛機恐懼症的他還說：「我上年至少搭咗七十次飛機，做世界巡迴同台灣宣傳搭得最多，重成日一早搭飛機走，凌晨又搭返香港，搭到驚呀！」
華仔完成工作後返港不用再頻撲，便每天在家不斷吃，幾天便發胖，相信農曆年再吃過年食品後會更肥，他說：「我早排驗完身，肥咗八磅，但喺晒塊面度呀！」問到新年願望是否減肥成功？華仔說：「其實個個都話我瘦，我只希望應肥則肥，唔好淨係肥面囉，我願望係新一年唔使再搭咁多飛機。」
採訪：蔡如玉
攝影：林德雄
協力：羅慧敏
鳴謝：海洋公園
