煲呔大量收購民主派人士，民主黨N年前嘅研究部主管劉細良，就係最新嘅煲呔黨成員，名義上係佳叔之下嘅中央政策組顧問，實際上應該係煲呔近身之一。過年前細良匆匆申請退出民主黨，八方問黨主席李永達，佢話唔會阻住細良，黨中央已經批准細良嘅退黨申請。
前黨員加入政府，正所謂知己知彼，民主黨日後可能好頭痕，達仔話無可奈何，佢話就算細良同煲呔連成一線，都希望細良唔好忘記乜嘢叫民主，繼續為民主努力。
今年新年，達仔都係留港消費。佢話今年最特別，喺過年期間會為街坊寫好多揮春。唔好睇小達仔，佢自詡小時勤練毛筆字，手字唔差。
八方知道唔少議員都有幫市民寫揮春，立法會不如整個寫揮春大賽，應該都有一番龍爭虎鬥。
傳真︰2623-9278
電郵︰[email protected]